საქართველოს პროკურატურამ ტრანსგენდერი ქალის, საბი ბერიანის, მკვლელობის საქმეზე სააპელაციო სასამართლოს მიერ 25 მაისს გამოტანილ გადაწყვეტილება უზენაეს სასამართლოში გაასაჩივრა. ინფორმაციას Lesbi.org.ge ავრცელებს.

სააპელაციო სასამართლომ 2016 წლის 25 მაისს, საბი ბერიანის მკვლელობაში ბრალდებული ლევან კ. კვლავ უდანაშაულოდ სცნო და ამით ძალაში დატოვა 2015 წლის 7 აგვისტოს თბილისის საქალაქო სასამართლოს გადაწყვეტილება.

პროკურორ ნანა ჯაყელის ცნობით, უზენაეს სასამართლოს ჯერ არ ჩაუნიშნავს საქმის განხილვის თარიღი.

2015 წლის 7 აგვისტოს თბილისის საქალაქო სასამართლომ საბი ბერიანის მკვლელობაში ბრალდებული ლევან კ. ნაწილობრივ გაამართლა. განაჩენის თანახმად, ლევან კ. სასამართლომ უდანაშაულოდ ცნო საბი ბერიანის მკვლელობაში, ხოლო დამანაშავედ - ბიანკა შიგუროვას ცემასა და ხანძრის განზრახ გაჩენაში.

2014 წლის 11 ნოემბერს ტრანსგენდერი საბი ბერიანი საკუთარ ბინაში მოკლეს. შსს-ს ინფორმაციით, მკვლელობა ლ.კ.-სა და ბერიანს შორის შელაპარაკების დროს მოხდა.