საერთაშორისო გამჭვირვალობა - საქართველო ყოფილი მთავარი პროკურორის, ოთარ ფარცხალაძის კომპანიისთვის, ქონების გადაცემაზე გამოძიების მოთხოვნით პროკურატურას მიმართავს. ორგანიზაციაში თბილისის მუნიციპალიტეტსა ფარცხალაძის კომპანიას შორის შესაძლო კორუფციულ გარიგებაზე საუბრობენ.

ორგანიზაციის განცხადებით, სახელმწიფო აუდიტის მიერ გამოქვეყნებულ ანგარიშში იკვეთება, რომ თბილისის მუნიციპალიტეტის შესაბამისი ორგანოები ქალაქის ქონებას არაგონივრულად განკარგავდნენ. ამით კი, შესაძლოა, ფარცხალაძის კომპანიასთან - შპს ბი ეს არ - სი დი ჯი დეველოპმენტთან გარკვეული კორუფციული გარიგების შედეგიც ყოფილიყო.

აუდიტის დასკვნით, ფარცხალაძის კომპანიას უკუნკურენტო, აუქციონის გზით, გადასცეს დაახლოებით 3 500 მ2 მიწა, რის შედეგადაც მერიამ დაკარგა დამატებითი შემოსავლის მიღების შესაძლებლობა. გარდა ამისა, იმავე კომპანიის საკუთრებაში არსებული მიწის სანაცვლოდ, რომელზეც გზა გაიყვანეს, მუნიციპალიტეტმა ბი ეს არ - სი დი ჯი დეველოპმენტს სხვა ტერიტორიაზე გადასცა სამი მიწის ნაკვეთი.

ამავე ანგარიშში ნათქვამია, რომ აღნიშნული პროცესის რამდენიმე წლით გაჭიანურების გამო, კომპანიამ მიწების ღირებულებებს შორის სხვაობის დასაფარად გაცილებით ნაკლები გადაიხადა, ვიდრე ეს ყველა პროცედურის დროულად დასრულების შემთხვევაში მოხდებოდა.

2017 წლის 12 მასისს სახელმწიფო აუდიტის სამსახურის ხელმძღვანელს, ლაშა თორდიას თავს დაესხნენ. ლაშა თორდია თავდასხმას მისი სამსახურის მიერ ყოფილი მთავარი პროკურორის, ოთარ ფარცხალაძის შესახებ მასალების მოგროვებას უკავშირებს. ოთარ ფარცხალაძის თქმით, თორდიას ბრალდებები სიცრუეა და კონფლიქტის ინიციატორი თავად გენერალური აუდიტორი იყო.