ამერიკის შეერთებული შტატების სახელმწიფო მდივანმა, ჯონ კერიმ, საქართველოს პრემიერ მინისტრთან, გიორგი კვირიკაშვილთან ერთად გამართულ პრესკონფერენციაზე მომავალ საპარლამენტო არჩევნებზე ისაუბრა.

სახელმწიფო მდივნის განცხადებით, საქართველო, მშვიდობიანი და დემოკრატიული გზით ხელისუფლების შეცვლის კუთხით, რეგიონის სხვა ქვეყნებისთვის მისაბაძი მაგალითია.

"8 ოქტომბრის არჩევნების თავისუფლად და სამართლიანად ჩატარება კიდევ ერთი წინ გადადგმული ნაბიჯი იქნება საქართველოსთვის", - აღნიშნა მან.

ჯონ კერის თქმით, მნიშვნელოვანია, ქვეყანაში იყოს მშვიდი და ძალადობისგან თავისუფალი საარჩევნო გარემო და ასევე დაცული უნდა იყოს მედიის თავისუფლება.

ამერიკის შეერთებული შტატების სახელმწიფო მდივანი საქართველოს დღეს ეწვია. დღესვე ხელი მოეწერა საქართველოსა და აშშ-ს შორის ურთიერთთანამშრომლობის მემორანდუმს. ჯონ კერი საქართველოს 7 ივლისს დატოვებს.