ამერიკის შეერთებული შტატების სახელმწიფო მდივანმა, ჯონ კერიმ, საქართველოს პრემიერმინისტრთან, გიორგი კვირიკაშვილთან ერთად დღეს, მთავრობის კანცელარიაში გამართულ პრესკონფერენციაზე რუსულ ოკუპაციაზე ისაუბრა.

მისი თქმით, რუსეთის ქმედებები აშშ-სთვის მიუღებელია:

"ჩვენ მუდმივად მოვუწოდებთ რუსეთის ფედერაციას, რომ შეასრულოს 2008 წელს დადებული შეთანხმება ცეცხლის შეწყვეტის შესახებ და გაიყვანოს თავისი საჯარისო ნაწილები საქართველოს ტერიტორიიდან".

მისივე თქმით, რუსეთმა უნდა აღადგინოს 2008 წლის აგვისტომდე არსებული სიტუაცია და მისცეს ჰუმანიტარულ და საერთაშორისო მისიებს ოკუპირებულ ტერიტორიაზე შესვლის საშუალება.

ამერიკის შეერთებული შტატების სახელმწიფო მდივანი საქართველოს დღეს ეწვია. დღესვე ხელი მოეწერა საქართველოსა და აშშ-ს შორის ურთიერთთანამშრომლობის მემორანდუმს. ჯონ კერი საქართველოს 7 ივლისს დატოვებს.