რუსეთის სოციალურ ქსელებში 16-17 თებერვალს ვირუსული ვიდეო გავრცელდა, რომელიც მოქალაქეებს არჩევნებში მონაწილეობისკენ მოუწოდებს. ვიდეოს მთავარი გმირი თავიდან ცოლს, რომელსაც არჩევნებზე წასვლა უნდა, ეკამათება, მაღვიძარის დაყენებას უკრძალავს და სამოქალაქო ვალის მოხდის სურვილის გამო დასცინის.

ვიდეორგოლის გმირს არჩევნების მომდევნო პერიოდი ესიზმრება. ის საკუთარი სახლის სამზარეულოში ახალგაზრდა გეის აღმოაჩენს, რომელიც პარტნიორთან დაშორების შემდეგ, ახალი კანონის თანახმად, დროებით მასთან უნდა დარჩეს. პიონერის ფორმაში გამოწყობილი შვილი მამას სკოლის დასაცავად 4 მილიონ რუბლს სთხოვს. ასევე, კაცს, ასაკის მიუხედავად, სავალდებულო სამხედრო სამსახურში იწვევენ: უწყება მასთან რამდენიმე სამხედროს მოაქვს, მათ შორის შავკანიანებს, რაც ნეგატიურ ცვლილებებზე მიუთითებს.

სოციალური ქსელების მომხმარებელთა ნაწილი ვიდეოში ჰომოფობიის, რასიზმისა და სექსიზმის გამოვლინებას ხედავს. ვიდეორგოლის ავტორების პოვნა Meduza-მ ვერ შეძლო.

ხმის მიცემა ერთ-ერთი მთავარი თემაა, რომელსაც სოციალურ ქსელებში განიხილავენ. საპრეზიდენტო არჩევნები 18 მარტსაა ჩანიშნული. რუსული მედიის ცნობით, ვლადიმერ პუტინს გამარჯვების მოპოვება მაღალი აქტივობის პირობებში სურს. ოპოზიციონერი ალექსეი ნავალნი, რომელიც არჩევნებზე არ დაარეგისტრირეს, მომხრეებს ხმის მიცემის ბოიკოტირებისკენ მოუწოდებს.