პოეტ ზვიად რატიანის უფლებადამცველები საზოგადოებრივი მაუწყებლის თვითრეგულირების მექანიზმს სააპელაციო საჩივრით მიმართავენ.

მიუხედავად იმისა, რომ თვითრეგულირების საბჭომ ვიდეოს გავრცელებაში დარღვევა ვერ დაადგინა, 3 თებერვალს საზოგადოებრივ მაუწყებელს ზვიად რატიანზე გავრცელებული ვიდეოს ყველა პლატფორმიდან აღება დაევალა. რატიანის წარმომადგენლები გადაწყვეტილებას სწორედ დარღვევის ნაწილში გაასაჩივრებენ:

"ვითხოვთ, რომ დადგინდეს პირადი ვხოვრების ხელშეუხებლობის უფლების ხელყოფა, სიძულვილის გაღვივება და ჯეროვანი სიზუსტის დარღვევა", - ამბობს On.ge-სთან მარიამ ქოქოსაშვილი, საქართველოს ახალგარდა იურისტთა ასოციაციის იურისტი.

აღნიშნული ვიდეო საზოგადოებრივის ვებ გვერდიდან ამ დრომდე არ წაშლილა.

თვითრეგულირების სააპელაციო ორგანო საზოგადოებრივი მაუწყებლის სამეურვეო საბჭოს წევრებისგან შედგება. საბჭოს საჩივარი ჯერ არ განუხილავს, თუმცა მისი პოზიცია უკვე ცნობილია - საბჭოსთვის მიუღებელი იყო ზვიად რატიანის დაკავების ამსახველ კადრების გამოქვეყნება.

პოეტი ზვიად რატიანი ე.წ. რეიდების დროს დააკავეს. მას სამართალდამცავები წინააღმდეგობის გაწევასა და წვრილმან ხულიგნობას ედავებოდნენ. რატიანი კი პოლიციელებს ცემაში ადანაშაულებს. საბოლოოდ სასამართლომ მას 2 000-ლარიანი ჯარიმა დააკისრა.

საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეო კადრები. საზოგადოებრივმა მასალა ისე მიაწოდა მომხმარებელს, რომ არ დაუზუსტებია, რომ აღნიშნული ვიდეო არა პოლიციის სამხრე კამერით, არამედ ტელეფონითაა გადაღებული, დამონტაჟებულია და არ ასახავს ინციდენტს სრულად.

ჩანაწერის გამოქვეყნების შემდეგ, მწერლებისა და გამომცემლების ჯგუფი საზოგადოებრივი მაუწყებლის სამეურვეო საბჭოს შეხვდა და მენეჯმენტის გათავისუფლება მოსთხოვა.

ჟურნალისტური ეთიკის ქარტიის საბჭოს გადაწყვეტილებით, ვიდეოს გამოქვეყნებით, საზოგადოებრივი მაუწყებლის ახალი და მიმდინარე ბლოკის დირექტორმა გიორგი გვიმრაძემ და ვებსაიტის რედაქტორმა ირინა დეკანოიძემ ქარტიის პირველი და მეათე პრინციპები დაარღვიეს.