"შინაგან საქმეთა სამინისტრო ცალსახად და ერთმნიშვნელოვნად ვამბობთ „არა ჩადებას“- ამის შესახებ მინისტრის მოადგილემ, ნათია მეზვრიშვილმა ჟურნალისტებთან საუბრისას განაცხადა:

"ამ მესიჯით ჩვენ ვამბობთ იმას, რომ არ ვაპირებთ, პირველ რიგში, "ჩადებას" - ეს ერთი, და მეორე - "ჩადება" არის ჩვენი პროფესიონალიზმისა და ჩვენი ინტელექტის შეურაცხყოფა."

მინისტრის მოადგილის თქმით სამინისტროში რეფორმებია დაგეგმილი:

"ეს არ არის ის მეთოდები, რომლის გამოყენებასაც სამინისტრო აპირებს და ამ კამპანიასთან შეერთებით ჩვენ ეს პოზიცია ძალიან მკაფიოდ დავაფიქსირეთ. ჩვენ გვაქვს ძალიან ამბიციური გეგმა რეფორმების და ის რეფორმები, რაც არაერთხელ დააანონსა შინაგან საქმეთა სამინისტრომ და ყველაფერი სწორედ ამისკენაა მიმართული"

გუშინ, შინაგან საქმეთა სამინისტროს ფეისბუკის ოფიციალურ გვერდზე წარწერა "არა ჩადებას!" გაჩნდა. უწყების პრესსამსახურში On.ge-ს უთხრეს, რომ ამით აქციას "არა ჩადებას!" შეუერთდნენ.

კითხვაზე - ეს ნიშნავს, თუ არა იმას, რომ "ჩადებები" ხდება - უწყების პრესსამსახურში ამბობენ, რომ "ამ სტატუსით ყველაფერი ნათქვამია".