პრეზიდენტის საპარლამენტო მდივნის, ანა ნაცვლიშვილის თქმით, მმართველმა პარტიამ გირგვლიანის სახელით მანიპულირებას თავი უნდა დაანებოს.

მისი თქმით, "გირგვლიანის პაკეტი" უნდა მოიცავდეს ისეთ მოქმედებებს, როგორიც არის იმ პროკურორებისგან, სპეცსამსახურების თანამშრომლებისგან და მოსამართლეებისგან გათავისუფლება, რომლებიც წლების განმავლობაში ადამიანის უფლებებს არღვევდნენ.

"სხვა შემთხვევაში "გირგვლიანის პაკეტი" იქნება ფარსი. რასაც ჩვენ ეს წლებია ვუყურებთ ეს არ არის მართლმსაჯულების განხორციელება დაზარალებული ადამიანების ინტერესების სასარგებლოდ, ეს არის მართლმსაჯულების ფარსი და ადამიანების ემოციებით მანიპულირება", - განაცხადა ანა ნაცვლიშვილმა.

საპარლამენტო უმრავლესობის წევრმა, მამუკა მდინარაძემ გუშინ გამართულ ბრიფინგზე განაცხადა, რომ ფრაქცია ქართული ოცნება ახალ საკანონმდებლო პაკეტზე იწყებს მუშაობას, რომელსაც "გირგვლიანი შესწორება" უწოდა.

მისი თქმით, ქართული ოცნება საზოგადოების წინაშე თავს ვალდებულად თვლის არამხოლოდ მართლმსაჯუება აღასრულოს, არამედ შეიქმნას პოლიტიკური და სამართლებრივი ბარიერები "გირგვლიანის საქმის რეციდივების გამოსარიცხად".