თინათინ ყაჯრიშვილის ახალი ფილმის "ჰორიზონტი" მსოფლიო პრემიერა ბერლინის საერთაშორისო კინოფესტივალზე, სექციაში "პანორამა" გაიმართება.

"თინამ სცენარის შესახებ ჯერ კიდევ გასულ სექტემბერს მიამბო, იმდენად საინტერესო სცენარი იყო, რომ მოწონება ვერ დავფარე და წარმატებები ვუსურვე. ორი თვის შემდეგ დამირეკა და მასთან მისვლა მთხოვა, ასე დაიწყო ჰორიზონტის რეპეტიციები. საკმაოდ საინტერესო პროცესი იყო მასთან მუშაობა, უფრო უახლოვდები, სიღრმისეულად არკვევ დეტალებს. პირველ თებერვალს დავიწყეთ გადაღებები და ძირითადად ფოთში, ქობულეთში, ბათუმსა და თბილისში გვიწევდა მოძრაობა. არ შემიძლია არ აღვნიშნო მხატვრების საოცარი ნამუშევარი, რადგან ჩემთვის დიდი მნიშვნელობა აქვს ატმოსფეროს სადაც თამაში მიწევს. ეს იყო არაჩვეულებრივი ჯგუფი, რომელთან მუშაობაც მომიწია და რაც მთავარია რეჟისორი, რომელიც შენთან, შენს პერსონაჟთან ერთად გადის მთელს გზას. საკმაოდ საპასუხისმგებლო როლი იყო, თუმცა დეტალებისგან და სიუჟეტის მოყოლისგან თავს შევიკავებ. უნდა აღვნიშნო, რომ ეს როლი ძალიან ემოციური იყო. ჩემი პერსონაჟი ერთი შეხედვით ლამაზი, უზრუნველყოფილი, მხიარული, თითქოს პრინციპული, მაგრამ საკმაოდ ტრაგიკული პიროვნებაა", - ამბობს მთავარი როლის შემსრულებელი, ია სუხიტაშვილი On.ge-სთან საუბრის დროს.

ფილმი ეროვნული კინოცენტრის მხარდაჭერით შეიქმნა. იგი საქართველო-შვედეთის კოპროდუქციაა. მთავარ როლებს ია სუხიტაშვილის გარდა - გიორგი ბოჭორიშვილი, სოსო გოგიჩაიშვილი, ნანა დათუნაშვილი, ჯანო იზორია და ლიკა ოყროშიძე ასრულებენ.

ყაჯრიშვილის ახალი ფილმი საქართველოს კინოთეატრებში 2018 წელს გამოვა.

ბერლინის 68-ე კინოფესტივალი 2018 წლის 15 თებერვალს დაიწყება და 25 თებერვალს დასრულდება.