რამდენიმე კვირის წინ, რუსეთის ულიანოვსკის ინსტიტუტის პირველი კურსის კადეტებმა პაროდიული ვიდეო გადაიღეს, რაც რუსეთში ყველაზე განხილვადი თემა გახდა. ესაა ისტორია სპონტანური სოლიდარობის, თვითორგანიზებისა და, შესაძლოა, თავისუფლების ტრიუმფის.

Satisfaction-ის ორიგინალი ვიდეო 2002 წელს გამოვიდა. კლიპი, თავის მხრივ, პაროდიულია: აშარჟებს მუსიკალურ კლიპებს, ეროტიკასა და რეკლამას. მასში რამდენიმე ახალგაზრდა, სექსუალური ქალი ბურღით, ხერხითა თუ უროთი მუშაობს და პოზირებს, თითქოს Victoria’s Secret-ის კატალოგისთვის იღებდნენ. კადეტების ვიდეოში მხოლოდ ბიჭები ფიგურირებენ, ჩანს კარგად გამთბარი სტუდენტური საცხოვრებლის ინტერიერი და ნივთები, რომლებიც იქ მოიპოვებოდა: ცოცხი, უთო, მინის საწმენდი სითხე. თუმცა, ვიდეოს ყველაზე მიმზიდველი ატრიბუტი საცვლების ამარა მოცეკვავე რუსი სტუდენტების შიშველი სხეულებია.

როგორ ჩანს, კადეტებს ვიდეოს გასაჯაროვება განზრახული არ ჰქონდათ, თუმცა იანვრის შუა რიცხვებში კლიპი ინტერნეტში გავრცელდა. საჰაერო ტრანსპორტის სამინისტრომ სპეციალური კომისიის შექმნა დააანონსა, რომელსაც "აღმაშფოთებელი ინციდენტის მიზეზები და გარემოებები უნდა მოეკვლია." პროკურატურამ საკუთარი გამოძიება წამოიწყო, თუმცა მალევე შეწყვიტა და განაცხადა, რომ არც ერთი კანონი არ დარღვეულა. საჰაერო ტრანსპორტის აკადემიის ხელმძღვანელმა საჯაროდ შეადარა კადეტები Pussy Riot-ს, საპროტესტო ჯგუფს, რომლის წევრებსაც ეკლესიაში ცეკვის მცდელობის გამო 2 წლით დააკავეს. ადგილობრივმა გუბერნატორმა კადეტების დასჯა და აკადემიიდან გარიცხვა მოითხოვა.

კლიპი მთავარი თემა იყო რუსეთის სახელმწიფო ტელევიზიის ტოქ-შოუებისთვისაც. "მე ვხედავ ჰომოსექსუალობის ნათელ გამოხატულებას", - უთხრა ერთ-ერთ რეპორტიორს ქალმა, რომელიც საკუთარ თავს სექსოლოგად მოიხსენიებდა. "ეს პროვოკაციაა", - განაცხადა მისმა დამ, რომელიც აუდიტორიის წინაშე ასევე სექსოლოგის სტატუსით წარსდგა.

რუსული ინტერნეტი კი ჰეშთეგით #Satisfaction საჰაერო ტრანსპორტის კადეტების მხარდამჭერ კლიპებში ჩაიძირა. (დაჟინებით გირჩევთ უყუროთ ყველა ვიდეოს.) ვიდეოები გადაიღეს სამშენებლო, აგრარული სასწავლებლების სტუდენტებმა და საგანგებო სიტუაციების სამინისტროს თანამშრომლებმა. შემდეგ იყვნენ მეჯინიბეები, თეატრალური დასი, სანიტარები, რუსეთის ბიატლონის ქალთა გუნდის წევრები. უკრაინულმა მოცურევეებმა საკუთარი კლიპი წყალქვეშ გადაიღეს. კიდევ ერთმა ჯგუფმა - გარეთ, თოვლში.

ყოველდღიურად სულ უფრო და უფრო მეტი ვიდეო ქვეყნდება. კლიპების ერთმანეთისგან განსხვავებულობა კი ამტკიცებს, რომ რუსეთი სულაც არაა ისეთი კონსერვატიული, როგორც კრემლს სურს წარმოაჩინოს. სოციოლოგებმა ეს დიდი ხანია იციან: მაშინ, როცა პუტინი რუსეთს "ტრადიციების დამცველი ცივილიზაციის ცენტრად" წარმოაჩენდა, დამოუკიდებელი კვლევები აჩვენებდა, რომ, მაგალითად, რუსების უმრავლესობა აბორტის უფლებას უჭერს მხარს და რომ ღალატის მიმართ ძალიან ტოლერანტულნი არიან.

ამავე დროს, რუსეთის მოსახლეობის უმრავლესობა იდენტიფიცირდება როგორც მართლმადიდებელი ქრისტიანი და ხშირად ჰომოფობიურ განწყობებს ავლენს. ეკლესია და ქვიარებზე ნადირობა კი კრემლის იდეოლოგიის ორი უდიდესი საყრდენია. ხელისუფლება გამუდმებით ახსენებს მოსახლეობას, რა მოსაზრებები უნდა გამოთქვან ამ საკითხებზე.

ეს ვიდეოები თამამი და ვულგარული გამოხატულებაა პროტესტისა, რომელიც რუსეთის ოფიციალური და ძალიან პოლიტიზებული ჰომოფობიიდან გამომდინარეობს. კლიპები ამტკიცებს, რომ რუსეთის მოქალაქეებს ჯერ კიდევ შეუძლიათ ჰორიზონტალური კომუნიკაციის დამყარება, მიუხედავად კრემლის ძალაუფლებისა, ზოგადი პროტესტის გამოხატვასა თუ "ჰომოსექსუალობის პროპაგანდაზე" დაწესებული ჯარიმებისა. თითოეული კლიპი ერთმანეთისთვის უცნობი ახალგაზრდების სოლიდარობის გამოხატულებაა, რომელიც აჩვენებს, რომ ჩვეულებრივ ადამიანებს აქვთ თვითორგანიზებისა და ერთად მოქმედების უნარი. უნარი, რომელიც თითქოს გამქრალი იყო. ვიდეოების უმრავლეოსობას საერთო დადგმა, ქორეოგრაფია და რისკი აერთიანებთ. კულმინაცია კი ის სცენაა, სადაც ათობით ახალგაზრდა ბიჭი ერთად ცეკვავს სამრეცხაოში, სტუდენტურ საერთო საცხოვრებელსა თუ წყალქვეშ.

ახალი ვიდეოების გამოჩენასთან ერთად, მათში სექსუალურობა იკარგება და უფრო კომიკური შინაარსი ძლიერდება. თუმცა, უმეტეს შემთხვევაში, ბოლო სცენა მკვეთრად ჰომოეროტიკულია. ეს ძალიან მნიშვნელოვანია ქვეყნისთვის, რომელიც არა მხოლოდ ღრმად ჰომოფობიურია, არამედ ანტი-გეი კამპანიას უდგას სათავეში. როგორ ჩანს, როცა საქმე ხელისუფლებასთან დაპირისპირებას შეეხება, ჰომოეროტიკული ქცევის თამამად გამოხატვა ეფექტიანი იარაღია.