ადამიანის უფლებათა დაცვის დეპარტამენტის პრეზენტაციაზე შინაგან საქმეთა მინისტრმა, გიორგი გახარიამ განაცხადა, რომ დეპარატმენტის ერთ-ერთი ძირითადი ფუნქცია სამართალდამცველების კომპეტენციის ამაღლება იქნება.

მისი თქმით, არის გარკვეული "კულტურული პრობლემები" როდესაც დაზარალებულს უჭირს საგამოძიებო ორგანოებთან და სამართალდამცველებთან თანამშრომლობა:

"განსაკუთრებულ დიდ მნიშვნელობას იძენს სამართალდამცველების კომპეტენცია, მათი ცოდნა და რა თქმა უნდა გამოძიების ხარისხი. სწორედ ამ ამოცანების გადასაჭრელად არის შექმნილი ეს დეპარტამენტი, სწორედ ეს იქნება მისი ძირითადი გამოწვევა და მსგავსი პრობლემების გადასაწყვეტად იქმნება ეს დეპარტამენტი".

შსს-მ ადამიანის უფლებათა დეპარტამენტი 19 იანვარს შექმნა. დეპარტამენტის თანამშრომლების მოვალეობა იქნება ქალთა მიმართ ძალადობის, სიძულვილით მოტივირებული დანაშაულის, ტრეფიკინგის, არასრულწლოვანთა მიერ და მათ მიმართ ჩადენილი დანაშაულის ფაქტებზე გამოძიების მონიტორინგი.

დეპარტამენტის ფუნქცია იქნება ხარვეზების იდენტიფიცირება, მათი აღმოფხვრის მიზნით რეკომენდაციის შემუშავება და პრაქტიკაში დანერგვა. ფუნქციების შესახებ დეტალური ინფორმაცია უკვე განთავსებულია საკანონმდებლო მაცნეს ვებგვერდზე.