ზოგიერთ მედიას თუ დავუჯერებთ, აშშ-ს მთავრობის საიდუმლო ხელოვნური თანამგზავრი „ზუმა“ შესაძლოა სერიოზულ პრობლემებში გადავარდა მისიის დროს ან გაშვებიდან ძალიან მალევე.

„ზუმა“ SpaceX-ის გიგანტურმა რაკეტამ, Falcon 9-მ გაუშვა ფლორიდას კანევარალის კონცხის საჰაერო ძალების სადგურიდან კვირას, 7 იანვარს. ამ მისიის შემდეგ Falcon 9 ისევ წარმატებით დაჯდა მიწაზე.

მისიის განმავლობაში ყველაფერი წესრიგში იყო. მისიას პირდაპირ ეთერში SpaceX-იც გადმოსცემდა. თუმცა, ორშაბათს, 8 იანვარს, კოსმოსური ფრენების საზოგადოებაში გავრცელდა ჭორები, რომ „ზუმას“ რაღაც შეემთხვა.

„ერთ-ერთ წყაროზე დაყრდნობით, ტვირთი უკან, დედამიწაზე ჩამოვარდა რაკეტა Falcon 9-ის აწ უკვე გახარჯული ზედა სტადიასთან ერთად“. - ამბობს Ars Technica-ს ჟურნალისტი ერიკ ბერგერი.

აქვე უნდა აღვნიშნოთ: „ზუმას“ კრახის შესახებ არც ერთი ოფიციალური განცხადება არ გავრცელებულა, არსებობს მხოლოდ ჭორები. SpaceX-ის წარმომადგენლებისა და Facebook-ის ლაივის მიხედვით კი, რაკეტამ თავისი საქმე იდეალურად შეასრულა.

„ასეთი ტიპის მისიებზე ჩვენ კომენტარს არ ვაკეთებთ, თუმცა ამჟამად, მონაცემების განხილვა მხოლოდ და მხოლოდ იმაზე მიუთითებს, რომ Falcon 9-მ საქმე ნომინალურად შეასრულა“. - აცხადებს Space.com-თან ინტერვიუში კომპანია SpaceX-ის წარმომადგენელი ჯეიმს გლისონი.

Space.com ასევე დაუკავშირდა აეროკოსმოსურ კომპანია Northrop Grumann-ს, რომელმაც „ზუმა“ აშშ-ს მთავრობისთვის შექმნა. „ეს არის კლასიფიცირებული მისია. ჩვენ კომენტარს არ ვაკეთებთ კლასიფიცირებულ მისიებზე“. - ამბობენ კომპანიაში.

ნამდვილად კლასიფიცირებულია. რაც „ზუმაზე“ ვიცით, არის ის მხოლოდ და მხოლოდ მისი ადგილი - დედამიწის ქვედა ორბიტა. უცნობია, რას გააკეთებს თანამგზავრი, ან რომელი სამთავრობო სააგენტო აიღებს მის მართვაზე პასუხისმგებლობას.

თუ რამეს გავიგებთ „ზუმას“ შესახებ, აუცილებლად გაცნობებთ.