დღეს გამართული მთავრობის სხდომის მთავარი განსახილველი საკითხი მაღალმთიან აჭარასა და დევდორაკში მომხდარი სტიქიებია. რეგიონული განვითარებისა და ინფრასტრუქტურის მინისტრის, ნოდარ ჯავახიშვილის განმარტებით, ქედაში, მერესა და შუახევში ჯამში 7 ხიდი წაიღო სტიქიამ, 2 კი დააზიანა, რის შედეგადაც შუახევში 4 სოფელია მოწყვეტილი გარე სამყაროს:

"შეგვიძლია, ვთქვათ, რომ მაღალი გავლადობის მანქანებისთვის შემოვლითი გზა არის. ამ ოთხი ხიდიდან (შუახევში) ერთია მნიშვნელოვანი, რომელიც აღგვადგენინებს სრულყოფილ კავშირს მოსახლეობასთან, სამუშაოები უკვე დაწყებულია, აჭარა თავისი ძალებით აკეთებს, ჩვენ საინჟინრო დახმარებას ვუწევთ. ასევე მათ სჭირდებათ რკინიგზიდან ვაგონების ძარები ხიდისთვის".

ჯავახიშვილის განმარტებით, თუ ამინდი ხელს არ შეუშლის მიმდინარე სამუშაოებს, დევდორაკის ხეობაში გზა 2 კვირაში გაიხსნება, თუმცა მინისტრი მიიჩნევს, რომ საჭიროა სხვა სერიოზული საინჟინრო გადაწყვეტილების მიღება.

პრემიერმინისტრმა კი განმარტა, რომ ამ დროისთვის გამონახულია ალტერნატიული სატრანსპორტო საშუალება:

"ეკონომიკის სამინისტრო მჭიდრო კავშირშია სომხეთის სატრანსპორტო სამინისტროსთან და უკვე ალტერნატივა გამონახულია, რომ ბორანის მეშვეობით მოხდეს ხილის გატანა. არა მხოლოდ სომხეთი, ჩვენი ექსპორტიორებიც იყენებენ ამას. ამიტომ მგონია, რომ დროებით ტრანსპორტირების საკითხი გადაწვეტილია, თუმცა სხვა საინჟინრო გადაწყვეტილება საჭიროა".

28 ივნისს ძლიერმა წვიმამ აჭარის მაღალმთიან რეგიონებს ზიანი მიაყენა, ხიდები მოწყვიტა და დააზიანა.