პანკისში, 26 დეკემბერს, სპეცოპერაციის დროს თავში დაჭრილი 19 წლის თემირლან მაჩალიკაშვილის მდგომარეობა კვლავ მძიმეა. როგორც ტელეკომპანია რუსთავი 2-ს წმინდა მიქაელ მთავარანგელოზის სახელობის საავადმყოფოს კლინიკური მენეჯერმა, ზაზა ლურსმანაშვილმა, განუცხადა მცირეოდენი სტაბილიზაციისა და დადებითი დინამიკის ნიშნები შეიმჩნევა.

როგორც ლურსმანაშვილი ოჯახზე დაყრდნობით ამბობს, პაციენტის მისაღებად მზადაა ავსტრიის ერთ-ერთი კლინიკა, რომელსაც საქართველოს ჯანდაცვის სამინისტროსგან ოფიციალური შეტყობინება არ მიუღია. მკურნალობის სხვა ქვეყანაში გასაგრძელებლად მოლაპარაკებებს საქართველოს ჯანდაცვის სამინისტრო რამდნიმე დღეა მართავს. On.ge უწყების პრესსამსახურისგან განახლებულ ინფომრაციას ელდება.

26 დეკემბერს, პანკისში ახმედ ჩატაევთან და მის თანამზრახველებთან კავშირის ბრალდებით ხუთი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც მაჩალიკაშვილს სპეცრაზმის წევრებმა ესროლეს.

აღნიშნული ინციდენტის გამო, სპეციალური დანიშნულების რაზმის წევრების მხრიდან სამსახურებრივი უფლებამოსილების შესაძლო გადამეტების ფაქტზე გამოძიება პროკურატურამ დაიწყო.

21-22 ნოემბრის ისნის სპეცოპერაციის შედეგად, რომელიც დაახლოებით 20 საათის განმავლობაში მიმდინარეობდა, დაიღუპა ერთი სპეცრაზმელი და დაიჭრა ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. ლიკვიდირებულთაგან ერთ-ერთი ახმედ ჩატაევია. სუს-ის ინფორმაციით, ისნის სპეცოპერაციის დროს გარდაცვლილები საქართველოსა და თურქეთში დიპლომატიური კორპუსის წარმომადგენლებზე ტერორისტულ აქტებს გეგმავდნენ.