საქართველოს ახალგაზრდა იურისტთა ასოციაციის განცხადებით, ჯანმრთელობის მდგომარეობის შესახებ ინფორმაციის გასაჯაროებით, შსს-მ პერსონალურ მონაცემთა შესახებ კანონი დაარღვია.

შსს-ს გენერალურმა ინსპექციამ, გუშინ, 26 დეკემბერს, განცხადება გაავრცელა, რომ კახეთში, სოფელ ქისტაურში მოქალაქის საცხოვრებელი სახლის ჩხრეკის დროს ქალის ჯანმრთელობის გაუარესება თავის ტვინში სიმსივნის ზრდამ გამოიწვია.

ასოციაციის თქმით, კანონის თანახმად, პირის ჯანმრთელობის მდგომარეობის შესახებ ინფორმაცია არის განსაკუთრებული კატეგორიის პერსონალური მონაცემი, რომელთა დამუშავებისთვისაც კანონი განსაზღვრავს მაღალ სტანდარტს:

"ჯანმრთელობის მდგომარეობის შესახებ ცნობებს ასევე სპეციალურ/განსაკუთრებულ კატეგორიად აღიარებს ევროპის საბჭოს კონვენცია "პერსონალური მონაცემების ავტომატური დამუშავებისას ფიზიკური პირების დაცვის შესახებ".

მათი თქმით, განსაკუთრებული კატეგორიის პერსონალური მონაცემები უნდა დამუშავდეს მხოლოდ კანონით განსაზღვრულ გამონაკლის შემთხვევებში, ხოლო მოცემულ საქმეში კანონით გათვალისწინებული გამონაკლისები არ ჩანს.

მათივე განმარტებით, ჯანმრთელობის მდგომარეობის შესახებ ინფორმაციის გასაჯაროების საჭიროება არ არსებობდა:

"საქმისადმი მაღალი საჯარო ინტერესის არსებობის შემთხვევაშიც, სამინისტროს მხრიდან პირის ჯანმრთელობის მდგომარეობის შესახებ ზოგადი ინფორმაციის გამჟღავნება, კონკრეტული დაავადებისა თუ სამედიცინო პრობლემის მითითების გარეშე, საკმარისი იქნებოდა საზოგადოების ინფორმირების მიზნით".

პერსონალურ მონაცემთა დაცვის ინსპექტორმა შინაგან საქმეთა სამინისტროს გენერალური ინსპექციის მიერ პირის ჯანმრთელობის მდგომარეობის შესახებ მონაცემების გასაჯაროებაზე მოკვლევა უკვე დაიწყო. მათივე თქმით, უწყებაში ინსპექტირების ფარგლებში დეტალურად შეისწავლიან დიაგნოზის გასაჯაროების სამართლებრივი საფუძვლებს, მიზანს და კანონთან შესაბამისობას.