მწერალი ზვიად რატიანი თბილისის საქალაქო სასამართლოში თავისი საქმის განხილვაზე ტვინის შერყევის გამო ვერ გამოცხადდა. ამის შესახებ სასამართლოში რატიანის ადვოკატმა ანა ნასრაშვილმა განაცხადა. რატიანი პოლიციური კონტროლის დროს ცემაში პოლიციის თანამშრომლებს ადანაშაულებს.

როგორც მწერლის ადვოკატი ამბობს, ის სასამართლოს რატიანის მდგომარეობის შესახებ მიაწვდის ინფორმაციას და სხდომის გადადებას მოითხოვს.

ზვიად რატიანი აცხადებს, რომ თამარ მეფის გამზირზე ნარინჯისფერ ქურთუკში გამოწყობილ პოეტს რამდენიმე ადამიანი მიუახლოვდა და დამცინავად ჰკითხა, თუ რატომ იყო ასეთი ფერის ტანსაცმლით შემოსილი. ადვოკატის თქმით, პოეტმა მიუგო, რომ ეს მათი საქმე არ იყო, რის შემდეგაც საუბარი გამწვავდა. ამის შემდეგ შსს-ს თანამშრომლებმა რატიანს სცემეს.

შსს-ს მტკიცებით კი რატიანი ნასვამი იყო, ვერ აკონტროლებდა ქცევას და ლექსიკას, იქცეოდა აგრესიულად, წინააღმდეგობას უწევდა და შეურაცხყოფას აყენებდა სამართალდამცველებს. შსს იმასაც უარყოფს, რომ პოლიციელებს ფორმა არ ეცვათ.

პოეტის მიმართ შედგენილია ადმინისტრაციული სამართალდარღვევის ოქმი. მას სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას და ხულიგნობას ედავებიან.

სამართალდამცავების მიმართ წაყენებულ ბრალდებასთან დაკავშირებით მთავარმა პროკურატურამ უკვე დაიწყო გამოძიება. მოკვლევას აწარმოებს შინაგან საქმეთა სამინისტროს გენერალური ინსპექციაც.