შინაგან საქმეთა სამინისტროს ცნობით, კახეთში, სოფელ ქისტაურში მოქალაქის საცხოვრებელი სახლის ჩხრეკის დროს ქალის დაშავების ფაქტს გენერალური ინსპექცია იკვლევს:

"სამინისტროს გენერალური ინსპექცია გადაცდომის თითოეულ ფაქტზე, ასეთის არსებობის შემთხვევაში, სამართლებრივ რეაგირებას მომავალშიც მოახდენს."

ამჟამად ქალი ინგოროყვას სახელობის სამედიცინო ცენტრშია გადაყვანილი. ინციდენტის შესახებ ინფორმაცია პირველად Reginfo-მ გაავრცელა, რომლის ინფორმაციით, დაშავებულის მდგომარეობა მძიმეა.

როგორც ქალის მაზლი, დავით ხოსიაშვილი რეგინფოსთან ყვება, ჩხრეკის დროს დაშავებული შიშისგან ავად გახდა, დავარდა და ფეხზე ვეღარ ადგა:

"ბავშვი ტიროდა. ვიდრე ჩვენ რძლის მოსულიერებას ვცდილობდით, პოლიციელები იცინოდნენ. ამბობდნენ, რომ ჩემი რძალი ავადმყოფობას იგონებდა... ექიმებმა გვითხრეს, რომ მდგომარეობა მძიმეა, თავში კაპილარი აქვს გაწყვეტილი, რამაც სისხლის გაჟონვა გამოიწვია. გადარჩება თუ არა, არვიცით".

22 დეკემბერს გამოცხადებული საპოლიციო კონტროლი შინაგან საქმეთა სამინისტრომ დღეს, 24 დეკემბერს, დაასრულა. შსს-ს საბოლოო მონაცემებით კონტროლის შედეგად სულ შემოწმდა 52 000-მდე პირი, დაკავებულია - 127.