ამერიკის შეერთებული შტატების წარმომადგენელი გაერთიანებული ერების ორგანიზაციაში, ნიკი ჰეილი, ტვიტერის პირად გვერდზე წერს, რომ აშშ დაიმახსოვრებს ყველა იმ ქვეყნის სახელს, რომელიც შეეწინააღმდეგება მათ გადაწყვეტილებას იერუსალიმის ისრაელის დედაქალაქად გამოცხადების შესახებ.

"გაეროში ჩვენ ყოველთვის გვთხოვენ, გავაკეთო და გავცეთ უფრო მეტი და მეტი. ამიტომ, როცა ჩვენ ამერიკელი ხალხის სურვილის შესაბამისად ვიღებთ გადაწყვეტილებას იმის შესახებ, თუ სად უნდა განვათავსოთ ჩვენი საელჩი, არ ველოდებით, რომ გავხდებით მათი სამიზნე, ვისაც ვეხმარებით. ჩვენი გადაწყვეტილების გასაკრიტიკებლად ხუთშაბათს იქნება კენჭისყრა. აშშ დაიმახსოვრებს სახელებს", - წერს ნიკი ჰეილი.

21 დეკემბერს გაეროში დაგეგმილია იმ რეზოლუციის კენჭისყრა, რომლითაც აშშ-ს მოუწოდებენ, უკან წაიღოს თავისი გადაწყვეტილება საელჩოს იერუსალიმში გადატანისა და შესაბამისად, ისრეალის დედაქალაქად იერუსალიმის გამოცხადების შესახებ.

აშშ-ს პრეზიდენტმა ისრაელის დედაქალაქდ იერუსალიმის გამოცხადების გადაწყვეტილება 2017 წლის 6 დეკემბერს გაახმოვანა, რასაც მსოფლიოში, განსაკუთრებით კი მუსლიმურ ქვეყნებში, უკმაყოფილება მოჰყვა.

ისლამური თანამშრომლობის ორგანიზაციის (OIC) წევრებმა, რომლებიც სტამბოლში, თურქეთის პრეზიდენტ რეჯეპ ტაიპ ერდოღანის ინიციატივით შეიკრიბნენ, აღმოსავლეთ იერუსალიმი პალესტინის დედაქალაქად გამოაცხადეს. თავად ერდოღანმა კი თქვა, რომ თურქეთის საელჩოს აღმოსავლეთ იერუსალიმში გახსნის და იგივე მოუწოდა დანარჩენ მსოფლიოსაც.