საქართველოში ევროკავშირის სადამკვირვებლო მისიას ერიკ ჰოეგი უხელმძანელებს. ამის შესახებ ინფორმაციას სადამკვირვებლო მისია ავრცელებს. ჰოეგი ლიტველ კიასტუტის იანკაუსკასს ჩაანაცვლებს.

2015 წლის 14 აპრილიდან ერიკ ჰოგს სადამკვირვებლო მისიის ხელმძღვანელის მოადგილის თანამდებობა ეკავა.

ევროკავშირის სადამკვირვებლო მისიაში საქმიანობის დაწყებამდე ჰოგი, 16 წლის განმავლობაში, დანიის საგარეო საქმეთა სამინისტროში ორმხრივი და მრავალმხრივი დიპლომატიის საკითხებზე მუშაობდა. დიპლომატიური კარიერის მანძილზე მას ხელმძღვანელის პოზიცია ეკავა კოპენჰაგენში და საზღვარგარეთ არსებულ მისიებში.

იგი ჩართული იყო საორგანიზაციო, ცვლილებების მართვის და საკადრო საკითხებში. დანიელი დიპლომატის რანგში, ერიკ ჰოგი მუშაობდა დანიის საელჩოში ტალინში (2001-2004) და მოსკოვში (2010-2012). ასევე - გაეროში დანიის მუდმივ წარმომადგენლობაში ნიუ-იორკში (2007-2010). ერიკ ჰოგი კოპენჰაგენის უნივერსიტეტის პოლიტიკურ მეცნიერებათა მაგისტრის ხარისხს ფლობს.