"შევეცდები დავარწმუნო ჩემი კოლეგები, რომ ამ ვითარებაში საქართველოს ინტეგრაცია ევროპაში კიდევ უფრო საშური საქმე გახდა" - ეს განცხადება პარლამენტის თავჯდომარემ, დავით უსუფაშვილმა ქრონიკასთან ინტერვიუში ბრიუსელში მას შემდეგ გააკეთა, რაც გუშინ ევროპის პარლამენტში საქართველოსთვის უვიზო მიმოსვლასთან დაკავშირებული სპეციალური საკომიტეტო მოსმენა გადაიდო:

"ეს არის უკვე ევროპრესტიჟის საქმე, რომ ევროსკეპტიკებს ნათლად დაანახოს, რომ ცალკეულ ქვეყნებში ცალკეული გადაწყვეტილებები ვერ შეცვლის ევროპის განვითარების ძირითად კურსს და ამ განვითარების ძირითად კურსში ეწერება საქართველოს ევროპული ინტეგრაცია".

უსუფაშვილის თქმით, მიუხედავად იმისა, რომ საქართველოსა და ბევრი სხვა მნიშვნელოვანი თემა გადაფარა დიდი ბრიტანეთის ევროკავშირიდან გასვლამ, ეს არ ნიშნავს, რომ საქართველოს საკითხი დღის წესრიგიდან მოიხსნება:

"მე დარწმუნებული ვარ, რომ ჩემი კოლეგები - ლიბერალ-დემოკრატიული პარტიის ლიდერები, მათ შორის ჰოლანდიის პრემიერმინისტრი, რომელიც დღევანდელი მდგომარეობის ევროკავშირის პრეზიდენტი ქვეყანაა, ამ მიდგომას მხარს დაუჭერს".

დავით უსუფაშვილი ბრიუსელში სამუშაო ვიზიტით იმყოფება.