თინა ხიდაშელი ირაკლი სესიაშვილს პასუხობს, თავდაცვის სამინისტროს მიერ სამხედროების გაწვევის გაუქმებასთან დაკავშირებით. თავდაცვის მინისტრი აცხადებს, რომ მასი და სესიაშვილის ხედვები სრულიად განსხვავებულია:

"სესიაშვილს აქვს ფილოსოფიური პრობლემა. მას მიაჩნია, რომ მონური შრომა 21-ე საუკუნეში ნორმალურია. მე მიმაჩნია რომ ეს არ არის ნორმალური. ჩვენ ძალიან სხვადასხვა მხარეს ვდგავართ".

პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის განმარტებით, ხიდაშელმა იცოდა, რომ ის ამ გადაწყვეტილების მიღების წინააღმდეგი იყო, თუმცა ეს არ გაითვალისწინა:

"ასეთი გადაწყვეტილებები, რომლებიც ძალიან მნიშვნელოვანია, ძალიან საკამათოა, რთულია და უკავშირდება ქვეყნის საერთო თავდაცვას და არა მხოლოდ თავდაცვის სამინისტროს ეხება, ეს საკითხი მაქსიმალურად უნდა იყოს განხილული მთავრობაზე, პარლამენტში, საზოგადოებაში".

28 ივნისს, თავდაცვის მინისტრმა, თინა ხიდაშელმა ბრძანებას მოაწერა ხელი, რომლის თანახმადაც თავდაცვის სამინისტრო სამხედრო მოსამსახურეებს ჯარში აღარ გაიწვევს. ცვლილება სამხედრო მოსამსახურეთა მხოლოდ იმ 25%-ს შეეხება, რომელსაც აქამდე ზემოაღნიშნული უწყება იწვევდა ჯარში. რაც შეეხება დანარჩენ 75%-ს, რომელსაც შსს და სასჯელაღსრულების დეპარტამენტი იწვევს ჯარში, მათ აღნიშნული ცვლილება არ ეხებათ.