საქართველოს მთავარ პროკურატურას უკრაინის გენერალური პროკურატურისგან არანაირი ინფორმაცია არ მიუღია. ამის შესახებ საგამოძიებო ორგანოს წარმოამდგენელმა On.ge-სთან საუბრისას განაცხადა.

უწყების ცნობით, საქართველოს პროკურატურას გაგზავნილი აქვს უკრაინული მხარისთვის შუამდგომლობა, მიხეილ სააკაშვილის საქართველოში ექსტრადირების თაობაზე, ხოლო შემდგომი გადაწყვეტილებები უნდა მიიღოს უკრაინის შესაბამისმა უწყებებმა.

დღეს, 5 დეკემბერს, კიევში მიხეილ სააკაშვილი დააკავეს. დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.

სახურავზე ყოფნისას, სააკაშვილი უკრაინის მოსახლეობას მოუწოდებდა, რომ ქუჩაში გამოსულიყო და ამ უსამართლობას წინ აღდგომოდა.

გავრცელებული ინფორმაციით, სააკაშვილის ბინაში ჩხრეკა მის მიერ ორგანიზებული მიტინგების წინა ხელისუფების მიერ დაფინანსებას უკავშირდდება.

მიხეილ სააკაშვილი უკრაინაში 256-ე მუხლის პირველი ნაწილის საფუძველზე დააკავეს, რაც დანაშაულებრივი ორგანიზაციების ხელშეწყობასა და მათი დანაშაულებრივი საქმიანობის დაფარვას ითვალისწინებს.

პარალელურად, მიხეილ სააკაშვილის მიმართ ბრალდების ყველა საქმე საქართველოში სასამართლო განხილვის სტადიაზეა. 2017 წლის პირველ სექტემბერს საქართველოს მთავარმა პროკურატურამ მისი დაკავებისა და ექსტრადიციის შუამდგომლობა გააგზავნა უკრაინის იუსტიციის სამინისტროში.