თბილისში, ხორავას ქუჩაზე, არასრულწლოვნის მკვლელობის საქმეზე დანაშაულის დაფარვის ბრალდებით დაკავებული პირი შინაგან საქმეთა სამინისტროდან დაითხოვეს. გათავისუფლების ბრძანებას ხელი მოწერილია. ამის შესახებ On.ge-ს შსს-ს პრესსამსახურში განუცხადეს.

პირველ დეკემბერს, როცა დანაშაული მოხდა, ის ჯერ კიდევ უწყების თანამშრომელი იყო. შსს-ს პრესსამსახურში კი განმარტავენ, რომ დაკავებული პირი ინციდენტის დროს უკვე კადრების განკარგულებაში იყო გადაყვანილი, რაც ნიშნავს, რომ უფლებამოსილებას აღარ ასრულებდა.

კითხვაზე როდიდან იყო დაკავებული კადრებისგან განკარგულებაში პრესსამსახურში ასე პასუხობენ:

"პირველში, როცა ინციდენტი მოხდა, ის უკვე კადრების განკარგულებაში იყო".

დღეს, 4 დეკემბერს, შინაგან საქმეთა სამინისტროს განცხადებით, ხორავას ქუჩაზე მომხდარი განზრახ მკვლელობის ფაქტთან დაკავშირებით კიდევ სამი პირი დააკავეს. ამ სამი პირიდან ერთი, სწორედ შსს-ს თანამშრომელი იყო, თუმცა უწყების განცხადებაში ამ საკითხზე საუბარი არ იყო.

დაკავებული რომ ინციდენტის დროს შსს-ში მუშაობდა, ამის შესახებ ინფორმაცია თავდაპირველად რუსთავი 2-მა გაავრცელა.