თერჯოლის რაიონის სოფელ ბროლისქედში, ავტომობილით გადაადგილებისას სამართალდამცველებმა ყაჩაღობაში ბრალდებულები დააკავეს. უწყების ინფორმაციით, დაკავებულია აზერბაიჯანის ორი მოქალაქე.

შსს აცხადებს, რომ დადგენილია ორგანიზებული ჯგუფის ყველა წევრის ვინაობა. ასევე ისიც, რომ ორგანიზებული დანაშაულებრივი ჯგუფის წევრებს შორის სამი საქართველოს მოქალაქეა, ორი კი აზერბაიჯანის რესპუბლიკის მოქალაქე. წინასწარი ინფორმაციით, ორივე მათგანი ცნობილი კრიმინალური ავტორიტეტის, ე.წ. კანონიერი ქურდის, ზედმეტსახელად გულის დაჯგუფების აქტიური წევრები არიან.

შსს-ს მტკიცებით, პოლიციამ, დაკავებულების პირადი ჩხრეკისას, გატაცებული თანხის ნაწილი - 90 ათასი აშშ დოლარი ნივთმტკიცებად ამოიღო. ჯგუფის სხვა წევრების დასაკავებლად კი მიმდინარეობს ოპერატიულ-სამძებრო და საგამოძიებო ღონისძიებები.

გამოძიების ვერსიით, გუშინ, პირველ დეკემბერს, ხარაგაულის რაიონის სოფელ საქასრიაში ორ მოქალაქეს, რომლებიც ბმვ-ს მარკის ავტომობილით თბილისიდან ბათუმის მიმართულებით მიემართებოდნენ, ცეცხლსასროლი იარაღებით შეიარაღებული ხუთი პირი თავს დაესხა. თავდამსხმელებმა მათ ძალადობითა და ძალის გამოყენების მუქარით, 140 ათასი აშშ დოლარი, მობილური ტელეფონები, ასევე, პირადი ნივთები გასტაცეს და შემთხვევის ადგილიდან მიიმალნენ.

გამოძიება დიდი ოდენობით ფულადი თანხის დაუფლების მიზნით ჯგუფურად ჩადენილი ყაჩაღობის ფაქტზე მიმდინარეობს.