არასამთავრობო ორგანიზაციების ნაწილისთვის მისასალმებელია მმართველი პარტიის მხრიდან სახალხო დამცველის შერჩევის პროცესში მათ მიერ შეთავაზებული ოთხი კანდიდატიდან ერთ-ერთის, ნინო ლომჯარიას მხარდაჭერა.

NGO-ების ცნობით, მათთვის მისასალმებელია ასევე, სახალხო დამცველის პოზიციაზე ქალი კანდიდატის დაყენება, გამომდინარე იქედან, რომ არჩევით თანამდებობებზე ქალთა წარმომადგენლობა საქართველოში ძალიან დაბალია:

"ნინო ლომჯარია, ჩვენ მიერ შეთავაზებულ სხვა კანდიდატებთან ერთად, გამოირჩევა პრინციპულობით, მაღალი კვალიფიკაციითა და კარგი რეპუტაციით. იმედი გვაქვს, რომ ნინო ლომჯარიას კანდიდატურას მხარს საპარლამენტო ოპოზიციაც დაუჭერს, რაც გაზრდის სახალხო დამცველის ლეგიტიმაციას".

ორგანიზაციების განცხადებით, სახალხო დამცველი უნდა სარგებლობდეს ადამიანის უფლებათა დამცველი ორგანიზაციებისა და აქტივისტური მოძრაობების მაღალი ნდობით.

ხელმომწერი ორგანიზაციებია:

  • კავშირი საფარი;
  • საერთაშორისო გამჭვირვალობა - საქართველო;
  • სამოქალაქო განვითარების სააგენტო;
  • სამართლიანი არჩევნების და დემოკრატიის საერთაშორისო საზოგადოება;
  • საქართველოს ახალგაზრდა იურისტთა ასოციაცია;
  • ინფორმაციის თავისუფლების განვითარების ინსტიტუტი;
  • ფონდი ღია საზოგადოება საქართველო;
  • კონსტიტუციის 42-ე მუხლი.

25 ნოემბერს ცნობილი გახდა, რომ საპარლამენტო უმრავლესობა სახალხო დამცველის კანდიდატად ნინო ლომჯარიას დაასახელებს.

საქართველოს მოქმედ სახალხო დამცველს, უჩა ნანუაშვილს უფლებამოსილება 7 დეკემბერს ეწურება. ნინო ლომჯარია ერთ-ერთი იყო იმ ოთხი ადამიანიდან, რომელთა კანდიდატურაც არასამთავრობო ორგანიზაციებმა უმრავლესობას შესთავაზეს.