კატალონიის 21 დეკემბრის არჩევნებისთვის წისაარჩევნო კამპანიაში რეგიონის ყოფილი ლიდერი, კარლეს პუჩდემონი ჩაერთო, წერს Politico. პუჩდემონი კამპანიას ბელგიიდან წარმართავს, სადაც მას შემდეგ იმყოფება, რაც ბარსელონადან გაიქცა.

"ჩვენ, კატალონიელებმა, ვაჩვენეთ მსოფლიოს, რომ გვაქვს შესაძლებლობა და სურვილი ვიყოთ დამოუკიდებელი სახელმწიფო. და [21 დეკემბერს] ეს უნდა დავადასტუროთ", - განაცხადა პუჩდემონიმ.

კატალონიის დამოუკიდებლობის რეფერენდუმისა და საკონსტიტუციო კრიზისის შემდეგ ესპანეთის პრემიერ-მინისტრმა, მარიანო რახოიმ რეგიონს ავტონომია ჩამოართვა და პირდაპირი მმართველობა დაიწყო. რახოიმ დაითხოვა კატალონიის რეგიონული პარლამენტი და ვადამდელი არჩევნები დანიშნა.

კატალონიის მთავრობის ყოფილი წევრები ბელგიაში

ესპანეთში პუჩდემონისა და მთავრობის სხვა წევრების წინააღმდეგ სისხლის სამართლის საქმეა აღძრული. ბრალდებულებს ამბოხება, აჯანყებისაკენ მოწოდება და სახელმწიფო სახსრების ბოროტად გამოყენება ედებათ ბრალად.

ბარსელონადან წასვლის შემდეგ კატალონიის ყოფილი პრეზიდენტი, კარლეს პუჩდემონი და რეგიონის ოთხი ყოფილი მინისტრი ბელგიის პოლიციას ჩაბარდნენ. თუმცა სასამართლომ ექს-ლიდერი და მისი ოთხი თანამშრომელი ქვეყნიდან გაუსვლელობის პირობით გაათავისუფლა.

როგორც პუჩდემონი ამბობდა, ის პოლიტიკურ თავშესაფარს არ მოითხოვს. მან, ასევე, თქვა, რომ ბარსელონაში მანამ არ დაბრუნდება, სანამ სამართლიანი სასამართლოს გარანტიას არ მიიღებს.

გაიგეთ მეტი: კატალონიის კრიზისი - დეტალები მოკლედ