თბილისის საქალაქო სასამართლომ თბილისში, დიდუბეში, ქალის შეურაცხყოფისთვის ადმინისტრაციული წესით დაკავებულ ორ კაცს 100-100-ლარიანი ჯარიმის გადახდა დააკისრა. ამის შესახებ ინფორმაცია On.ge-ს შინაგან საქმეთა სამინისტროს პრესსამსახურში მიაწოდეს.

მათივე ინფორმაციით, ორივე კაცი ქალისთვის შეურაცხყოფის მიყენების დღეს დააკავეს საქართველოს ადმინისტრაციულ სამართალდარღვევათა კოდექსის 166-ე მუხლით. ამ მუხლით, წვრილმანი ხულიგნობა - საზოგადოებრივ ადგილებში ლანძღვა-გინება, მოქალაქეებზე შეურაცხმყოფელი გადაკიდება და სხვა ამგვარი მოქმედება, რომელიც არღვევს საზოგადოებრივ წესრიგსა და მოქალაქეთა სიმშვიდეს ისჯება 100 ლარის ოდენობით თანხით, ან თუ საქმის გარემოებებისა და დამრღვევის პიროვნების გათვალისწინებით ამ ზომის გამოყენება არასაკმარისად იქნება მიჩნეული - ადმინისტრაციულ პატიმრობას 15 დღემდე ვადით.

რამდენიმე დღის წინ ფეისბუკში ვიდეო გავრცელდა, სადაც ისმოდა როგორ აყენებდნენ სიტყვიერ შეურაცხყოფას ქალს დიდუბის ავტოსადგომის მიმდებარე ტერიტორიაზე.