გამომძიებელ ჟურნალისტს ხადიჯა ისმაილოვას აზერბაიჯანის სასამართლომ საბანკო ანგარიშები გაუყინა. ამის შესახებ ისმაილოვამ Facebook-ზე დაწერა:

"შეტყობინება მივიღე, რომ ვიღაც ჩემი გუგლის ანგარიშში შეღწევას ცდილობდა, შემდეგ წერილი მივიღე სასამართლოსგან, რომ ჩემი საბანკო ანგარიში შეიზღუდა, 10 დღის ვადაში შემიძლია გავასაჩივრო გადაწყვეტილება."

როგორც ისმაილოვამ Meydan TV-ის უთხრა, ის საკითხის გარკვევას შეეცდება:

"როგორც ჩანს, სურთ, რომ დრო დამაკარგვინონ სამართლებრივი პროცედურებით, რაც ძალიან სამარცხვინოა."

Meydan TV-ს ცნობით, აზერბაიჯანის გადასახადების სამინისტროს კომენტარი არ გაუკეთებია.

ხადიჯა ისმაილოვა, რომელმაც აზერბაიჯანის ელიტის კორუფციული საქმიანობა გამოააშკარავა, 2014 წელს გადასახადებისთვის თავის არიდების და არალეგალური მეწარმეობის ბრალდებით დააკავეს და ექვსი წელი და ექვსი თვე მიუსაჯეს. ისმაილოვა ბრალდებებს უარყოფდა და ამბობდა, რომ მისი საქმიანობის გამო დააპატიმრეს.

2016 წელს აზერბაიჯანის უზენაესმა სასამართლომ ჟურნალისტის გათავისუფლების გადაწყვეტილება მიიღო, თუმცა ხუთწლიანი გამოსაცდელი ვადა მისცა. მოგვიანებით სასჯელი 2 წლამდე და სამ თვემდე შემცირდა.

საპატიმროდან გათავისუფლების მიუხედავად, ისმაილოვას ქვეყნიდან გასვლის უფლება არ აქვს.