პრემიერ-მინისტრმა გიორგი კვირიკაშვილმა განათლებისა და ფინანსთა ახალ მინისტრებთან შეხვედრისას განაცხადა, რომ შესაძლოა ალექსანდრე ჯეჯელავა დიპლომატიურ სამსახურში წავიდეს. მისივე თქმით, ოთხპუნქტიანი რეფორმის ფარგლებში ჯეჯელავამ მნიშვნელოვანი ნაბიჯები გადადგა.

"ვსაუბრობთ სანდროსთან - შესაძლოა, ის დიპლომატიურ სამსახურში წავიდეს, თუმცა როგორც ვესაუბრე, მას გული უფრო ისევ განათლების სფეროში პედაგოგიური მიმართულებით ბიზნესსაქმიანობისკენ მიუწევს და ვნახოთ, რა გადაწყვეტილებას მიიღებს. ის ჩვენი გუნდის წევრი არის და ძალიან ღირსეული ადამიანია", - განაცხადა კვირიკაშვილმა.

დღეს, 13 ნოემბერს გამართულ ბრიფინგზე პრემიერ-მინისტრმა გიორგი კვირიკაშვილმა დაადასტურა მთავრობაში დაგეგმილი ცვლილებები, რომლის მიხედვით, განათლების მინისტრის პოსტზე ალექსანდრე ჯეჯელავას მიხეილ ჩხენკელი შეცვლის.

ალექსანდრე ჯეჯელავა მინისტრის თანამდებობას გასული წლის ივნისიდან იკავებდა. მანამდე ის მართვის აკადემიის თავმჯდომარე და წამყვანი ტრენერი იყო ზოგადი მენეჯმენტის, გაყიდვების მართვის, დროის მართვისა და პროექტების მართვის მიმართულებით.