თბილისის აგრარულ ბაზრებში, სანიტარულ-ჰიგიენური ნორმების შემოწმების შედეგად, დარღვევების გამო ოთხი ბიზნესოპერატორი დააჯარიმეს. მათგან ორს კრიტიკული შეუსაბამობების გამო საწარმოო პროცესი შეუჩერდა და 1000 ლარით დაჯარიმდა.

სურსათის ეროვნული სააგენტოს ინფორმაციით, ინსპექტორებმა თბილისის აგრარული ბაზრები, განსაკუთრებით, მაღალი რისკის სურსათის - ხორცის და რძის პროდუქტების სექციები შეამოწმეს.

სააგენტოს განცხადებით, მიმდინარე წელს საქართველოს აგრარულ ბაზრებში 161 ბიზნესოპერატორი შეამოწმეს. სახელმწიფო კონტროლის ფარგლებში, შემოწმდა 200-ზე მეტი ობიექტი, დაჯარიმდა 53, ამათგან ოთხი რეგისტრაციის გარეშე საქმიანობისათვის, ხოლო 18 ბიზნესოპერატორს კრიტიკული შეუსაბამობების გამო საწარმოო პროცესი შეუჩერდა.

უწყებაში განმარტავენ, რომ შეუსაბამობების აღმოფხვრასთან დაკავშირებით, ბიზნესოპერატორებს მისცეს შესაბამისი მითითებები და უმეტესობას აღნიშნული რეკომენდაციების გათვალისწინების შემდეგ საქმიანობის უფლება აღუდგა.