რუსეთის საპატრიარქოს წარმომადგენლების საქართველოს საპატრიარქოში ვიზიტის შესახებ ინფორმაციას რუსეთის საპატრიარქო ავრცელებს.

მათ მიერ გავრცელბულ განცხადებაში წერია, რომ რუსეთის საპატრიარქოს დელეგაცია საქართველოში ვიზიტისას კათოლიკოს-პატრიარქ შიო III-ს შეხვდა. მიტროპოლიტმა ანტონიმ შიოს პატრიარქ კირილის მოკითხვა გადასცა, მხარეებმა კი ორ ეკლესიას შორის ურთიერთობების გაძლიერებაზე ისაუბრეს.

"2026 წლის 30 სექტემბერს, საქართველოში ვიზიტის ფარგლებში, მოსკოვის საპატრიარქოს საგარეო საეკლესიო ურთიერთობათა განყოფილების თავმჯდომარე, ვოლოკოლამსკის მიტროპოლიტი ანტონი და მისი თანმხლები პირები თბილისში წმინდა ადგილებს ეწვივნენ. რუსეთის მართლმადიდებელი ეკლესიის დელეგაციამ მოინახულა სამების საკათედრო ტაძარი და სიონის საკათედრო ტაძარი, სადაც მიტროპოლიტმა ანტონიმ ახალქალაქის, კუმურდოსა და კარის მიტროპოლიტ ნიკოლოზთან ერთად საქართველოს კათოლიკოს-პატრიარქ ილია II-ის საფლავთან პანაშვიდი გადაიხადა. მან ასევე მოილოცა სიონის ტაძარში დაცული წმინდა ნინოს ვაზის ჯვარი და მანგლისელი წმინდა იოანეს წმინდა ნაწილები. დელეგაცია ასევე ეწვია თბილისში მდებარე კეთილმორწმუნე დიდი მთავრის ალექსანდრე ნეველის სახელობის რუსულ ტაძარს.

საქართველოს საპატრიარქოში ვოლოკოლამსკის მიტროპოლიტ ანტონის საქართველოს მართლმადიდებელი ეკლესიის წინამძღვარი, სრულიად საქართველოს კათოლიკოს-პატრიარქი შიო III შეხვდა. რუსეთის მართლმადიდებელი ეკლესიის წარმომადგენელმა პატრიარქ კირილისგან საქართველოს ეკლესიის მეთაურს ძმური მოკითხვა და კეთილი სურვილები გადასცა. პატრიარქმა შიომ დელეგაციას ვიზიტისთვის მადლობა გადაუხადა და აღნიშნა, რომ შეხვედრა მნიშვნელოვანია ორ ეკლესიას შორის ურთიერთობების გაძლიერებისთვის. მხარეებმა ორი ეკლესიის თანამშრომლობისა და მართლმადიდებლობისთვის საერთო მნიშვნელობის საკითხები განიხილეს, შეხვედრის ბოლოს კი საჩუქრები გაცვალეს", — წერია რუსეთის საპატრიარქოს მიერ გავრცელებულ ინფორმაციაში.

რუსეთის საპატრიარქოს დელეგაციის საქართველოში ვიზიტის შესახებ ინფორმაცია გაავრცელა საქართველოს საპატრიარქოს საზოგადოებასთან ურთიერთობის სამსახურმაც. მათი ცნობით, მხარეებმა შეხვედრაზე ქვეყნებს შორის ურთიერთობებზე ისაუბრეს. ყურადღება გამახვილდა მტკივნეულ რეგიონებში არსებულ ვითარებასა და იმაზე, თუ რა შეიძლება გაკეთდეს, რათა გამოინახოს გზები, რომ საქართველოს მართლმადიდებელ ეკლესიას შესაძლებლობა ჰქონდეს, ადგილობრივ მრევლთან ურთიერთობა დაამყაროს".