სახალხო დამცველის, უჩა ნანუაშვილის განცხადებით, ოკუპირებულ ტერიტორიაზე მცხოვრებმა და საჯარო სექტორში დასაქმებულმა პირებმა სახელმწიფო პენსია უწყვეტად უნდა მიიღონ. ამასთანავე, ომბუდსმენმა საქართველოს პარლამენტს საქართველოს პენსიის შესახებ საქართველოს კანონში შესატან ცვლილებებთან დაკავშირებით საკანონმდებლო წინადადებით მიმართა.

სახალხო დამცველის თქმით, საქართველოს რეგიონების ოკუპაციის შედეგად მოსახლეობა მძიმე მდგომარეობაშია:

"ოკუპირებულ ტერიტორიებზე სრულყოფილად არ ვრცელდება სახელმწიფო პროგრამები, არ არსებობს სამართლებრივი თუ სოციალური დაცვის ეფექტური სისტემა, ეთნიკურად ქართველი მოსახლეობა კი ყოველდღიურად განიცდის დისკრიმინაციას საკუთარი ეროვნებისა და მშობლიური ენის გამო".

ომბუდსმენს მიაჩნია, რომ არსებული პრობლემების გათვალისწინებით, საჭიროა შესაბამისი ცვლილების შეტანა კანონში, რომელიც უზრუნველყოფს ოკუპირებულ ტერიტორიაზე მომუშავე პირთა დაცვას ერთგვაროვანი მიდგომისაგან და გაითვალისწინებს ამ რეგიონებში არსებულ რთულ უფლებრივ ვითარებას.