IPRM-ის შეხვედრაზე საოკუპაციო რეჟიმის მიერ გამოთქმულ იმედს, რომლის მიხედვითაც საქართველოს მთავრობასთან მოლაპარაკებით, საზღვართან ქართული საგუშაგო პოსტის გაუქმებას ცდილობენ, პარტია გახარია — საქართველოსთვის ლიდერი, გიორგი გახარია სოციალურ ქსელში გამოეხმაურა.

მისი თქმით, ჩორჩანას საგუშაგო, რომელიც საქართველოს ტერიტორიაზე მდებარეობს, იცავდა ქართულ მიწას უკანონო მითვისებისგან და იქ მცხოვრებ ქართველ მოსახლეობას ე.წ. "მცოცავი ოკუპაციისგან". მისივე განმარტებით, ე.წ ჩორჩანას საქმეზე მის წინააღმდეგ აღძრული ბრალდებები პოლიტიკურ დევნა და პირდაპირი თავდასხმაა საქართველოს ტერიტორიულ მთლიანობასა და სუვერენიტეტზე.


"დღევანდელ IPRM-ის შეხვედრაზე ცხინვალის საოკუპაციო რეჟიმმა კიდევ ერთხელ გამოთქვა იმედი, რომ ქართული ოცნების ხელისუფლება დაშლის ჩორჩანას საგუშაგოს, რომელიც ჩემი ხელმძღვანელობით შეიქმნა ოკუპაციის შემდგომი გაფართოების თავიდან ასაცილებლად.

ეს საგუშაგო, რომელიც საქართველოს ტერიტორიაზე მდებარეობს, იცავდა ჩვენს მიწას უკანონო მითვისებისგან და იქ მცხოვრებ ქართველ მოსახლეობას — ე.წ. "მცოცავი ოკუპაციისგან".

ჩორჩანას საქმეზე ჩემს წინააღმდეგ აღძრული ბრალდებები წარმოადგენს პოლიტიკურ დევნას და პირდაპირ თავდასხმას საქართველოს ტერიტორიულ მთლიანობასა და სუვერენიტეტზე, რაც აშკარად კოორდინირებულია რუსეთთან და საოკუპაციო რეჟიმთან", — დაწერა გიორგი გახარიამ.

ცნობისთვის, 130-ე IPRM-ის (ინციდენტების პრევენციისა და მათზე რეაგირების მექანიზმის) შეხვედრის შეჯამებისას, ე.წ. სამხრეთ ოსეთის დელეგაციის ხელმძღვანელმა ეგორ კოჩიევმა იმედი გამოთქვა, რომ ოკუპირებული ცხინვალის რეგიონში, სოფელ უისტასთან ახლოს, მდებარე "არალეგალური ქართული პოლიციის პოსტი" გაუქმდება. ამის შესახებ ინფორმაციას ადგილობრივი მედია ავრცელებს.

"შარშან 22 დეკემბრიდან ვითარება სტაბილური, პროგნოზირებადი და მშვიდია, რაც გარკვეულ ოპტიმიზმს გვაძლევს. ერთ-ერთი საკითხი, რომელიც დავაყენეთ, არის ქართული პოლიციის პოსტის არალეგალური ყოფნა ე.წ. სამხრეთ ოსეთის ტერიტორიაზე, სოფელ უისტასთან ახლოს. ჯერჯერობით გარღვევა არ გვაქვს, თუმცა არის გარკვეული იმედი, რომ ქართულ მხარეს დავარწმუნებთ და ეს პოსტი მოიხსნება", — განაცხადა კოჩიევმა.

ტერიტორიული საკითხების გარდა, შეხვედრაზე განხილული იყო საჰაერო სივრცის უსაფრთხოებაც. დელეგაციის ხელმძღვანელის თქმით, ბოლო ორი თვის განმავლობაში უპილოტო საფრენი აპარატების გამოჩენის არც ერთი შემთხვევა არ დაფიქსირებულა.

ეგორ კოჩიევმა ასევე გამოთქვა იმედი, რომ მიმდინარე წელი მოლაპარაკებების პროცესისთვის გარდამტეხი იქნება.

"ვიმედოვნებთ, რომ მომავალი წელი უფრო პოზიტიური და პროდუქტიული იქნება. იმედია, წარსულში მომხდარი მცირე ინციდენტები ჩაცხრება და მთელ საზღვრის ხაზზე მშვიდი ვითარება გვექნება", — აღნიშნა მან.

IPRM-ის ფორმატში მოლაპარაკებების შემდეგი რაუნდი გაზაფხულზე გაიმართება — 131-ე შეხვედრა 31 მარტს არის დაგეგმილი.

შეგახსენებთ, 2009 წლის თებერვალში, ჟენევის მოლაპარაკებების მეოთხე რაუნდზე მიღწეული შეთანხმების შედეგად, როგროც აფხაზეთის ისე სამხრეთ ოსეთის მიმართულებით, ინციდენტების პრევენციისა და მათზე რეაგირების მექანიზმი (IPRM) შეიქმნა.

აღნიშნული ფორმატის მთავარი მიზანს წარმოადგენს ადგილზე ყოველდღიური ინციდენტების განხილვა და ოპერატიული რეაგირების უზრუნველყოფა. ინციდენტების პრევენციისა და მათზე რეაგირების მექანიზმის ფარგლებში მოქმედებს ცხელი ხაზი, რომლის მიზანია კონკრეტული ინციდენტებზე დროული რეაგირება და მისი აღმოფხვრა.