თბილისის ყოფილი მერისა და ევროპული საქართველოს ერთ-ერთი ლიდერის, გიგი უგულავას თქმით, მას არ მოეწონა ექს-პრეზიდენტის, მიხეილ სააკაშვილის განცხადება, როდესაც თქვა, რომ უკრაინაში დაკავებულ მეგის ქარდავას არ იცნობდა.

"ცნობით არც მე არ იცნობდი იმ ადამიანს, მაგრამ ფაქტია, რომ იქ, ციხეებში ბევრი უბედურება ხდებოდა. პოლიტიკური პასუხისმგებლობა ჩვენზეა, ვინც ვიყავით ხელისუფლებაში. მე მერი ვიყავი საერთოდ არაფერში მეხებოდა, მაგრამ მე ეს მტკივა. ეს ჩემი პოლიტიკური პასუხისმგებლობაა, ეს მიხეილ სააკაშვილის პოლიტიკური პასუხისმგებლობაა, ამიტომ გვერდზე გადაგდება არასწორია", - თქვა გიგი უგულავამ გადაცემა 360 გრადუსში.

მისივე განმარტებით, ის გრძნობს პოლიტიკურ პასუხისმგებლობას და სურს ამის გამოსწორება, რადგან ამას ქართული ოცნება "ვერ გამოასწორებს":

"ქართულმა ოცნებამ სასამართლო გამოიყენა მარტო შურისძიებისთვის, არ გამოუყენებია მართლმსაჯულების ინტერესებისთვის".

რამდენიმე დღის წინ გავრცელდა ინფორმაცია, რომ უკრაინაში საქართველოს თავდაცვის სამინისტროს სამხედრო პოლიციის ყოფილი ხელმძღვანელი მეგის ქარდავა დააკავეს. მეგის ქარდავა ქართული მხარის მოთხოვნით ინტერპოლით წითელი ცირკულარით იძებნებოდა.

სააპელაციო სასამართლომ ყოფილ მაღალჩინოსანს მეგის ქარდავას სერგო თეთრაძის საქმეზე პატიმრობა მიუსაჯა. მას დაუსწრებლად ცხრა წლით თავისუფლების აღკვეთა აქვს შეფარდებული.