საქართველოს თავდაცვის სამინისტროს სამხედრო პოლიციის ყოფილი ხელმძღვანელი მეგის ქარდავა უკრაინაში დააკავეს. ამის შესახებ ინფორმაციას ტელეკომპანია რუსთავი 2 ავრცელებს.

მეგის ქარდავა ქართული მხარის მოთხოვნით ინტერპოლით წითელი ცირკულარით ძებნილთა სიაშია.

On.ge დაუკავშირდა შინაგან საქმეთა სამინისტროს, უწყების პრესსამსახურმა განაცხადა, რომ მსგავსი ინფორმაცია მათთან ჯერჯერობით არ შესულა.

სააპელაციო სასამართლომ ყოფილ მაღალჩინოსანს მეგის ქარდავას სერგო თეთრაძის საქმეზე პატიმრობა მიუსაჯა. მას დაუსწრებლად ცხრა წლით თავისუფლების აღკვეთა აქვს შეფარდებული.

სასამართლოს გადაწყვეტილებით, ის დამნაშავედ სცნეს 144-ე და 138-ე მუხლებით, რაც სექსუალური ხასიათის ძალმომრეობასა და წამებას გულისხმობს.

პროკურატურის ინფორმაციით, პატიმრობაში ყოფნის ოთხი დღის განმავლობაში სამხედრო პოლიციისა და სასჯელაღსრულების დაწესებულების სხვადასხვა თანამდებობის პირებისა და მოხელეების, ასევე მათი დავალებით სხვა პატიმრების მონაწილეობით, სერგო თეთრაძე აღიარებითი ჩვენების მიღების მიზნით არაერთხელ ცემეს სასტიკად, აწამეს, შეულახეს ღირსება, რის შედეგადაც სერგო თეთრაძე ძალადობის განხორციელების პროცესში გარდაიცვალა გულ-სისხლძარღვთა მწვავე უკამრისობით.