სახალხო დამცველი სააპელაციო სასამართლოს მიერ რუსთავი 2-ის საქმესთან დაკავშირებული გადაწყვეტილების გამოცხადებიდან მე–12 დღეს მხარისათვის მის გაგზავნასა და ჩაბარებას ეხმაურება და განმარტავს, რომ აღნიშნული ქმედება არ შეესაბამება კანონს.

ომბუდსმენი ამბობს, რომ სამოქალაქო დავებზე გადაწყვეტილებათა ჩაბარების მოქმედი წესის თანახმად, სასამართლოს მზად უნდა ჰქონდეს გადაწყვეტილება, ხოლო მხარე თავად წყვეტს, როგორია მისი დაცვის სტრატეგია, პირველივე შესაძლებლობისთანავე გამოცხადდება სასამართლოში გადაწყვეტილების ჩასაბარებლად თუ არა, ვადის პირველივე დღეს წარადგენს საკასაციო საჩივარს თუ ბოლო დღეს.

სახალხო დამცველის თქმით, დაუშვებელია მხარის ამ არჩევანში სასამართლოს ჩარევა და მხარის ნების ჩანაცვლება სასამართლოს მიერ გამოხატული ნებით:

"როგორც სამაუწყებლო კომპანია რუსთავი 2-ის გენერალური დირექტორი ნიკა გვარამია მიუთითებს, თბილისის სააპელაციო სასამართლოს გადაწყვეტილების ადრეულ ეტაპზე ჩაბარებულად მიჩნევა აზიანებს მათ იმ ინტერესს, რომელიც სამოქალაქო დავის საბოლოო გადაწყვეტამდე საქართველოს საკონსტიტუციო სასამართლოს მიერ მათსავე საკონსტიტუციო სარჩელზე გადაწყვეტილების გამოტანას უკავშირდება".

გარდა ამისა, სახალხო დამცველისათვის არაა ცნობილი ისეთი შემთხვევა, როდესაც, სასამართლომ ისე განმარტა და გამოიყენა კანონი, როგორც ამ განსახილველ საქმეში:

"დაუშვებელია სასამართლომ თავისი ქმედებებითა და გადაწყვეტილებებით შექმნას შერჩევითი მართლმსაჯულების განცდა, ამოიკითხოს საკუთარი უფლებამოსილება კანონს მიღმა და გამოიყენოს ის სელექციურად და დაუსაბუთებლად".

ომბუდსმენის განცხადებაში ასევე განმარტებულია სამოქალაქო საპროცესო კოდექსის 2591 მუხლიც, რომლის თანახმადაც:

"თუ გადაწყვეტილების გამოცხადებას ესწრება გადაწყვეტილების გასაჩივრების უფლების მქონე პირი, ან თუ ასეთი პირისათვის საქართველოს კანონმდებლობით დადგენილი წესით ცნობილი იყო გადაწყვეტილების გამოცხადების თარიღი, გადაწყვეტილების გასაჩივრების მსურველი მხარე (მისი წარმომადგენელი) ვალდებულია გადაწყვეტილების სარეზოლუციო ნაწილის გამოცხადებიდან არა უადრეს 20 და არა უგვიანეს 30 დღისა გამოცხადდეს სასამართლოში და ჩაიბაროს გადაწყვეტილების ასლი; წინააღმდეგ შემთხვევაში გასაჩივრების ვადის ათვლა დაიწყება გადაწყვეტილების გამოცხადებიდან 30-ე დღეს. ამ ვადის გაგრძელება და აღდგენა დაუშვებელია.“

22 ივნისს რუსთავი 2-ის გენერალურმა დირექტორმა, ნიკა გვარამიამ განაცხადა, რომ სააპელაციო სასამართლომ მათ ნაადრევად გაუგზავნა გადაწყვეტილება, რისი უფლებაც არ ჰქონდა, რადგან სააპელაციო სასამართლო როგორც წესი, მხარეებს თავის გადაწყვეტილებას არ უგზავნის. გვარამიას თქმით, მხარეებმა სააპელაციოს გადაწყვეტილება სასამართლოდან თავისით უნდა წამოიღონ არაუადრეს 20 და არაუგვიანეს 30 დღისა.

სააპელაციო სასამართლომ გვარამიას ბრალდებების პასუხად განმარტა, რომ რუსთავი 2-ის საქმეზე დასაბუთებული გადაწყვეტილება სასამართლომ 12 დღეში გადასცა მხარეებს, რადგან სამოქალაქო საპროცესო კოდექსის 257-ე მუხლის მე-2 ნაწილის თანახმად, სარეზოლუციო ნაწილის გამოცხადებიდან 14 დღის ვადაში სასამართლო ვალდებულია მოამზადოს აღნიშნული დოკუმენტი.