ჩიკაგოს პოლიციამ შინეიდ ო'კონორის ძებნა მას შემდეგ დაიწყო, რაც მათ ირლანდიის პოლიციიდან აცნობეს, რომ მომღერალი თვითმკვლელობას აპირებდა. როგორც მედიასაშუალებების მიერ გავრცელებული ინფორმაციით ირკვევა, მომღერალმა გაუჩინარებამდე თავის ნათესავებს დაურეკა ირლანდიაში და მათ გააცნო თავისი თვითმკვლელობის გეგმა.

NBC-ის ცნობით, ხუთშაბათს, ჩიკაგოს დროით შუადღის 3:30-ზე, ირლანდიის პოლიციამ ჩიკაგოს სამართალდამცავთა დეპარტამენტში დარეკა და აუწყა მათ, რომ მომღერალი შინეიდ ოკონორი სავარაუდოდ ერთ-ერთ ხიდზე იყო და თვითმკვლელობას აპირებდა.

პოლიცია ირლანდიელ მომღერალს უკვე ეძებს. საზოგადოებაში დაბნეულობა გამოიწვია იმ ფაქტმაც, რომ შინეიდ ოკონორის ძებნის დაწყებიდან 2 საათში პოლიციამ სხვა ადამიანი გადაარჩინა ხიდიდან გადახტომასა და თვითმკვლელობას.

ამის პარალელურად, ირლანდიელმა მომღერალმა ფეისბუკის ოფიციალურ გვერდზე 1 საათის წინ პოსტი გამოაქვეყნა, სადაც უარყოფს თვითმკვლელობის მცდელობას და ამასთან ერთად დიდი ბრიტანეთის ევროკავშირიდან გასვლას ეხმაურება და ასევე ირლანდიის დამოუკიდებლობაზე აკეთებს აქცენტს:

"ირლანდია დიდი ბრიტანეთის საკუთრება აღარ არის, ვულოცავ ყველა ადამიანს, ჩემი ჩათვლით, ვინც ამისთვის იბრძოდა".

შინეიდ ოკონორი 15 მაისსაც დაიკარგა, თუმცა მომღერალი მეორე დღეს იპოვეს. ოკონორმა მაშინ განაცხადა, რომ ველოსიპედით სეირნობისას გზა აებნა.