საქართველოს ახალგაზრდა იურისტთა ასოციაცია ონისე ოქრიაშვილზე თავდასხმას ეხმაურება. ორგანიზაციის შეფასებით, იუმორისტზე თავდასხმა "სახელმწიფოს მიერ შექმნილი ძალადობრივი გარემოს შედეგია, რომელიც უკვე წლებია აქტიურად გამოიყენება ქართული ოცნების მიმართ კრიტიკულად განწყობილი ადამიანების წინააღმდეგ".

"ონისე ოქრიაშვილზე თავდასხმა არ არის იზოლირებული შემთხვევა. იგი სახელმწიფოს მიერ შექმნილი ძალადობრივი გარემოს შედეგია, რომელიც უკვე წლებია აქტიურად გამოიყენება ქართული ოცნების მიმართ კრიტიკულად განწყობილი ადამიანების წინააღმდეგ. ქართული ოცნება ოპონენტების წინააღმდეგ ძალადობრივ გარემოს ჯერ ქმნის, და შემდეგ ინარჩუნებს, რითაც, რეპრესიის სხვა ფორმებთან ერთობლიობაში, ჩნდება, მათ შორის, ფიზიკური უსაფრთხოების მნიშნველოვანი გამოწვევები.

ძალადობის წამახალისებელ კოორდინირებულ კამპანიებში დიდი როლი აქვს პრო-სახელისუფლებო მედიას, რომელიც, ფაქტობრივად, საზოგადოებაში თავისუფალი გამოხატვის, შეკრებისა და სხვა ძირითადი უფლებებით სარგებლობისაგან შემაკავებელი ეფექტის შექმნის მიზნით ძალადობის სამიზნეების მონიშვნისა და მათი დისკრედიტაციის ფუნქციას ასრულებს.

ამნესთი ინთერნეიშენალმა 2026 წლის ივნისში გამოაქვეყნა ანგარიში საქართველოში რეპრესიების შესახებ. ანგარიშში ამნესთი ინთერნეიშენალი საუბრობს სულ მცირე 6 ადამიანზე, რომლებიც 2023 წლიდან დისკრედიტაციის კამპანიის შედეგად გახდნენ ფიზიკური ძალადობის სამიზნე," — წერს საია.

აქტივისტი და იუმორისტი ონისე ოქრიაშვილი წუხელ სამმა პირმა საკუთარ სახლთან სცემა. დაზიანებებით ოქრიაშვილი კლინიკაში გადაიყვანეს, სადაც საჭირო კვლევები ჩაუტარდა. აქტივისტმა კლინიკა გვიან ღამით დატოვა.

თავდასხმას წინ უძღოდა პროპაგანდისტული მედიების კრიტიკა ონისე ოქრიაშვილის მიერ ნოდარ დუმბაძეზე ხუმრობის გამო. მასზე თავდამსხმელი პირი მოგვიანებით დააკავეს.