კოალიცია ცვლილებისთვის ერთ-ერთი ლიდერი, ნიკა გვარამია სოციალურ ქსელში ეუთოს საპარლამენტო ასამბლეის მიერ მიღებულ ჰააგის დეკლარაციას გამოეხმაურა.

ოპოზიციონერი პოლიტიკოსის განცხადებით, აღნიშნული გადაწყვეტილება საერთაშორისო დონეზე უმნიშვნელოვანეს დემოკრატიულ პრეცედენტს აყალიბებს, რაც მმართველი გუნდის პოზიციებს კიდევ უფრო აკნინებს. მისი თქმით, ეუთოს ჰააგის დეკლარაციამ საბოლოოდ დაასრულა ქართული ოცნების დელეგიტიმაციის პროცესი.

ამასთანავე, გვარამიამ ყურადღება გაამახვილა ქვეყანაში არსებულ საარჩევნო გარემოსა და იმ გამოწვევებზე, რომელთა წინაშეც ოპოზიციური სპექტრი დგას.

• ეუთოს საპარლამენტო ასამბლეამ დაამტკიცა ჰააგის დეკლარაცია, რომელშიც საქართველოს საკითხზე რეზოლუცია შევიდა
• საქართველოს დელეგაციამ ეუთო-ს საპარლამენტო ასამბლეის სხდომა კენჭისყრამდე პროტესტის ნიშნად დატოვა
• ეუთო-ს საპარლამენტო ასამბლეამ საქართველოს შესახებ კრიტიკული რეზოლუციის პროექტს მხარი დაუჭირა

"ეუთოს ჰააგის დეკლარაციამ საბოლოოდ დაასრულა ქართული ოცნების დელეგიტიმაციის პროცესი. ეს თავი უკვე დახურულია და ვერაფერი ეშველებათ ქოცებს: ქართული ოცნება არალეგიტიმურია და მასთან საუბარი მხოლოდ როგორც ე.წ. ეფექტური კონტროლის განმახორციელებელთან იქნება.

მეტიც, ეუთომ საერთოდ პრეცედენტული გადაწყვეტილება მიიღო, მოუწოდა რა დემოკრატიულ ქვეყნებს, რომ ეუთოს სადამკვირვებლო მისიის მიერ ნეგატიურად შეფასებული არჩევნების შედეგები არ ცნოს. უმნიშვნელოვანესი ძვრაა დემოკრატიული სტანდარტების დადგენის თვალსაზრისით და, სამწუხაროდ, საქართველოს ნეგატიური მაგალითის საფუძველზე.

და რა დაასკვნა ამ ყველაფრიდან ქართულმა ოცნებამ? ის, რომ ყველაზე გავლენიანი და მნიშვნელოვანი სადამკვირვებლო მისია — ეუთო ოდირი — საერთოდ აღარ შემოუშვას ქვეყანაში.

კიდევ უფრო საინტერესო გახდა, რას ემყარება ზოგიერთი კოლეგის არჩევნებისთვის მზადება (და ნამდვილად არ ვგულისხმობ მხოლოდ ლელოს, მათ სასარგებლოდ უნდა ითქვას, რომ არ მალავენ მაინც და ჩუმჩუმად არ მიიპარებიან არჩევნებისკენ) როცა,

მილიონი ემიგრანტი არჩევნებიდან ჩახსნილია,

კომისიებში ქოცები უდიდესი უმრავლესობით არიან,

არც შიდა და არც გარე დამკვირვებელი არ იქნება,

სასამართლოში გასაჩივრებას ნულოვანი აზრი აქვს,

ბიზნესი ისეა გაპრესილი, რომ ოპოზიციის დაფინანსება კი არა, ემალება ოპოზიციონერებს, უახლოესი მეგობრებიც რომ იყვნენ,

ოპოზიციური ტელევიზიები სულს ღაფავენ.

და ეს მხოლოდ წმინდად საარჩევნო საკითხებია. ის, რომ პარტიები გაუქმების პირას არიან და ყველა პარტიის ლიდერი ციხეში, მაგაზე არც ვლაპარაკობ", — დაწერა გვარამიამ.

შეგახსენებთ, საქართველოს დელეგაციამ უარი თქვა ეუთო-ს საპარლამენტო ასამბლეაზე გამართულ კენჭისყრაში მონაწილეობაზე, სადაც საქართველოს საკითხზე კრიტიკული რეზოლუცია მიიღეს. მათ სხდომა პროტესტის ნიშნად დატოვეს.

პარლამენტის საგარეო ურთიერთობათა კომიტეტის თავმჯდომარის ნიკოლოზ სამხარაძის განცხადებით, დეკლარაციის შესწორებული ვერსიის ცალკეული ნაწილები განზრახ ამახინჯებს საქართველოში არსებულ პოლიტიკურ რეალობას.

ცნობისთვის, ეუთო-ს საპარლამენტო ასამბლეამ, 8 ივლისს მიიღო რეზოლუცია "საქართველოში საარჩევნო კეთილსინდისიერებისა და ფუნდამენტური თავისუფლებების დაცვის შესახებ", რომლის ინიციატორი ამერიკელი კონგრესმენი ჯო უილსონია.