მსოფლიოში წლიდან წლამდე ბევრი რამ იცვლება, მაგრამ ერთი რამ უცვლელი რჩება: როცა საქმე საცხოვრებლად საუკეთესო ქალაქის დასახელებას ეხება, პირველი ადგილისთვის თითქმის ყოველთვის ვენა და კოპენჰაგენი იბრძვიან. ზედიზედ მეორედ, წელს ეს დაძაბული შერკინება დანიის დედაქალაქის გამარჯვებით დასრულდა.

ბრიტანული მედიაორგანიზაცია The Economist-ის კვლევითმა მიმართულებამ, EIU-მა, ტრადიციულად, წელსაც დაასახელა მსოფლიოში საცხოვრებლად საუკეთესო ქალაქების ათეული. სიის შესადგენად, სხვადასხვა ქვეყნის 173 ქალაქი რამდენიმე კრიტერიუმით შეფასდა, მათ შორის, განათლება, სტაბილურობა, ჯანდაცვა, ინფრასტრუქტურა და კულტურა. აქედან სამ კატეგორიაში — სტაბილურობა, ინფრასტრუქტურა და განათლება — კოპენჰაგენმა უმაღლესი შეფასება დაიმსახურა და ზედიზედ მეორედ აართვა მოწინავე პოზიცია ვენას, რომელიც მანამდე სამი წლის განმავლობაში სახელდებოდა საცხოვრებლად საუკეთესო ქალაქად. EIU-ის წარმომადგენელი კოპენჰაგენს ასევე უქებს კულტურას, გარემოზე ზრუნვას და საზოგადოებრივი მომსახურების მაღალ ხარისხს.

პატარა ქალთევზას ქანდაკება — დანიის დედაქალაქ კოპენჰაგენის სიმბოლო

ფოტო: Shutterstock

ათეულში კოპენჰაგენს და ვენას მესამე პოზიციაზე მოჰყვება ავსტრალიის ქალაქი მელბურნი, რომელიც გასული წლის შემდეგ ერთი პოზიციით დაწინაურდა. შარშანდელს შემდეგ, მეექვსიდან მეოთხე პოზიციაზე გადაინაცვლა კიდევ ერთმა ავსტრალიურმა ქალაქმა, სიდნეიმ. აი, ციურიხი კი, რომელიც წინა წელს ვენას უთანაბრდებოდა მეორე ადგილზე, ამჯერად მეხუთე პოზიციამდე ჩამოქვეითდა.

ჩამონათვალზე ასევე აისახა მსოფლიოში მიმდინარე კონფლიქტები. შუა აღმოსავლეთში დაძაბული ვითარების გამო, ომანის დედაქალაქი მასკატი 14 პოზიციით ჩამოქვეითდა 123-ე ადგილამდე, ელ-ქუვეითი კი — 12 პოზიციით 105-ე ადგილამდე. საცხოვრებლად ყველაზე ცუდ ქალაქად კვლავაც სირიის დედაქალაქი დამასკო მიიჩნევა. თუმცა, სიის ბოლო ათეულში მცირე ცვლილებები მაინცაა: ომის შედეგად, თეირანმა 164-ე ადგილზე გადაინაცვლა, კიევმა კი —166-ე პოზიციაზე. ცვლილების მხრივ, რეიტინგში შესამჩნევია ჩინეთის ქალაქების დაწინაურებაც, რაც ჯანდაცვის კომპონენტში ქულების მომატებითაა განპირობებული.

საცხოვრებლად საუკეთესო ქალაქების ათეული კი, საბოლოოდ, წელს ასე გამოიყურება:

  1. კოპენჰაგენი, დანია
  2. ვენა, ავსტრია
  3. მელბურნი, ავსტრალია
  4. სიდნეი, ავსტრალია
  5. ციურიხი, შვეიცარია
  6. ჟენევა, შვეიცარია
  7. ოსაკა, იაპონია
  8. ადელაიდა, ავსტრალია
  9. ვანკუვერი, კანადა
  10. ტოკიო, იაპონია