პარტიამ დროა ანკარაში დაგეგმილ NATO-ს სამიტთან დაკავშირებით განცხადება გაავრცელა. მმართველი გუნდის კრიტიკის ფონზე, პარტია ყურადღებას ამახვილებს იმ გარემოებაზე, რომ საქართველო აღნიშნულ საერთაშორისო ფორუმზე წარმოდგენილი არ იქნება.

პარტია დროა ხაზს უსვამს, რომ მაშინ, როდესაც ქვეყნის უმაღლესი პირები თეირანში სამგლოვიარო ცერემონიებს ესწრებიან, საქართველო რეგიონული უსაფრთხოების განმხილველ უმნიშვნელოვანეს საერთაშორისო ფორუმზე მიწვევის გარეშე დარჩა.

"ხვალ ანკარაში NATO-ს სამიტი იმართება. მასში მონაწილეობას NATO-ს წევრი და ალიანსის პარტნიორი ქვეყნები მიიღებენ. მონაწილეთა შორის საქართველო არ არის.
მაშინ, როდესაც საქართველოს არალეგიტიმური პრეზიდენტი და არალეგიტიმური პრემიერმინისტრი არ ტოვებენ სამგლოვიარო ცერემონიებს თეირანში, მათ შორის, ტერორისტ აიათოლა ალი ხამენეის დაკრძალვას, რომელიც ირანის ტერორისტულმა რეჟიმმა მოკავშირეთა მობილიზაციის კამპანიად აქცია, საქართველო არ იქნება წარმოდგენილი ამ უმნიშვნელოვანეს საერთაშორისო ფორუმზე. არ იქნება იქ, სადაც რეგიონის უსაფრთხოება განიხილება", — წერია პარტიის განცხადებაში.

განცხადებაში აღნიშნულია, რომ 2026 წლის სამიტის მთავარი თემა სამხედრო და თავდაცვის ინდუსტრიის განვითარებაა, რაც საქართველოსთვის სასიცოცხლოდ მნიშვნელოვანია, ხოლო პროცესებს აშშ-ის პრეზიდენტი დონალდ ტრამპიც დაესწრება.

"2026 წლის NATO-ს სამიტის ერთ-ერთი მთავარი თემაა ალიანსის როლი თანამედროვე სამხედრო მრეწველობის განვითარებაში, როგორც წევრ, ასევე პარტნიორ სახელმწიფოებში. ეს შეეხება საჰაერო თავდაცვის, საარტილერიო, ანტი-სატანკო, კიბერ თავდაცვისა და დრონების ინდუსტრიის განვითარებას, რაც საქართველოს თავდაცვისუნარიანობისთვის სასიცოცხლოდ მნიშვნელოვანი სფეროებია.

საქართველოს უშუალო სამეზობლოში NATO-ს სამიტის გამართვა კიდევ ერთხელ ადასტურებს საერთაშორისო საზოგადოების განსაკუთრებულ ყურადღებას შავი ზღვის რეგიონის მიმართ. სამიტს ესწრება პრეზიდენტი ტრამპი, რომელიც ორმხრივ შეხვედრებს გამართავს თურქეთის, უკრაინისა და სირიის პრეზიდენტებთან", — წერს დროა.

ოპოზიციური პარტიის შეფასებით, მოქმედმა ხელისუფლებამ ქვეყანა საერთაშორისო იზოლაციაში მოაქცია, გამოსავალი კი ევროატლანტიკურ გზაზე დაბრუნება და პროდასავლური კოალიციური მმართველობის ჩამოყალიბებაა.

"ივანიშვილის რუსულმა რეჟიმმა საქართველო ჩამოაშორა ევროატლანტიკურ კურსს და მარტო დატოვა რუსეთის, ირანისა და ჩინეთის პირისპირ, რაც ჩვენი ქვეყნის დასუსტების, ჩვენი სახელმწიფოებრიობის ხელყოფისა და საბოლოო ჯამში, სუვერენიტეტის დაკარგვის გარდაუვალი გზაა.

საქართველოს აღარ იწვევენ იქ, სადაც რეგიონული მშვიდობის საკითხები წყდება, სადაც ჩვენი უსაფრთხოებისთვის სასიცოცხლოდ მნიშვნელოვანი თემები განიხილება, სადაც უმაღლეს დონეზე უნდა იყოს წარმოდგენილი საქართველოს ნებისმიერი ხელისუფლება, რომელსაც ქვეყნის უსაფრთხოება, ტერიტორიული მთლიანობის აღდგენა და ხანგრძლივვადიანი მშვიდობა ადარდებს.

საქართველოს ევროპულ და ევროატლანტიკურ გზაზე დაბრუნების, ჩვენი ქვეყნის სამშვიდობოს გაყვანის ერთადერთი გზა — ივანიშვილის რუსული რეჟიმის ჩამოშლა და ისეთი კოალიციური მმართველობის ჩამოყალიბებაა, რომელიც არა კრემლის, ირანის ტერორისტული რეჟიმისა და ჩინეთის კომუნისტური პარტიის, არამედ საქართველოს მოქალაქეთა ინტერესებით მართავს ქვეყანას", — წერია პარტიის განცხადებაში.

შეგახსენებთ, რომ 7-8 ივლისს ანკარაში NATO-ს სამიტი ჩატარდება, სადაც საქართველო მიწვეული არ არის. სამიტს NATO-ს 32 წევრი ქვეყნის ლიდერები დაესწრებიან, მათ შორისაა აშშ-ის პრეზიდენტი დონალდ ტრამპი.

გავრცელებული ცნობით, სამშაბათს საღამოს NATO-ს ლიდერებთან ერთად ვახშამს უკრაინის პრეზიდენტი ვოლოდიმირ ზელენსკი, ევროპული საბჭოს პრეზიდენტი ანტონიო კოსტა და ევროკომისიის პრეზიდენტი ურსულა ფონ დერ ლაიენიც დაესწრებიან.