პარტია მოქალაქეების ლიდერმა, ალეკო ელისაშვილმა, პარლამენტის თავმჯდომარის, შალვა პაპუაშვილის, წინააღმდეგ სასამართლოში სარჩელი შეიტანა. ელისაშვილის ადვოკატის, გიორგი რეხვიაშვილის, განმარტებით, პაპუაშვილმა საჯარო გამოსვლებში არაერთხელ დაარღვია უდანაშაულობის პრეზუმფცია და ბრალდებულ ოპოზიციონერ პოლიტიკოსს "ტერორისტი" უწოდა.

ადვოკატის თქმით, ელისაშვილს თავდაპირველად სხვისი ნივთის დაზიანებას ედავებოდნენ, ხოლო პაპუაშვილის აღნიშნული განცხადების შემდეგ, მას ბრალი ტერორისტულ საქმიანობაზე გადაუკვალიფიცირეს.

რეხვიაშვილის თქმით, ის ფაქტი, რომ მისი დაცვის ქვეშ მყოფის საქმეზე სასამართლოს განაჩენი ჯერ არ გამოუტანია, პაპუაშვილს არ აძლევს უფლებას, მას დამნაშავე უწოდოს. ადვოკატის შეფასებით, აღნიშნული ქმედება "პროკურატურასა და სასამართლოზე ზეწოლას წარმოადგენს".

"პარლამენტის ტრიბუნიდან გაკეთდა განცხადებები, რომ ალექსანდრე ელისაშვილი ტერორისტია. მოგახსენებთ, რომ 2025 წლის 29 ნოემბერს ალექსანდრე ელისაშვილი დააკავეს სხვისი ნივთის დაზიანების ფაქტზე, ხოლო მას შემდეგ, რაც შალვა პაპუაშვილმა განაცხადა, რომ ეს არ არის სხვისი ნივთის დაზიანება და ტერორისტული აქტია, პროკურატურამაც დაუყოვნებლივ შეცვალა საქმის კვალიფიკაცია.

როგორც პროკურატურაზე განხორციელდა პირდაპირი ზეწოლა, რაც აღნიშნული ბრალის კვალიფიკაციის შეცვლაში გამოიხატა, ასევე ზეწოლა განხორციელდა სასამართლოზეც, რათა შესაბამისი გადაწყვეტილება მიიღოს და ალექსანდრე ელისაშვილი მტკიცებულებების გარეშე ტერორისტული აქტის ჩადენაში დამნაშავედ ცნოს. ჩვენ, რა თქმა უნდა, ვითხოვთ, რომ თბილისის საქალაქო სასამართლომ დაადგინოს, რატომ დაარღვია შალვა პაპუაშვილმა არაერთხელ [უდანაშაულობის პრეზუმფცია] და რატომ შელახა ალექსანდრე ელისაშვილის პატივი, ღირსება და საქმიანი რეპუტაცია," — განაცხადა ადვოკატმა "ტვ პირველთან" საუბრისას.

ეს არ არის პირველი შემთხვევა, როდესაც ბრალდებულებმა ღირსების შელახვისა და უდანაშაულობის პრეზუმფციის დარღვევის გამო შალვა პაპუაშვილის წინააღმდეგ სასამართლოს მიმართეს. 2025 წლის 12 დეკემბერს პროევროპულ აქციებში მონაწილეობისთვის მსჯავრდებული ზვიად ცეცხლაძის ოჯახმა პაპუაშვილს სასამართლოში უჩივლა.

"[პაპუაშვილი] ტერორისტს უწოდებს ჩემს შვილს, რომელიც ტერორიზმის მუხლით საერთოდ არ ყოფილა გასამართლებული და თავდაპირველად წარდგენილი მუხლიც კი უფრო მსუბუქი კვალიფიკაციით შეუცვალეს", — განაცხადა ზვიად ცეცხლაძის მამამ.

2 იანვარს ცნობილი გახდა, რომ აქტივისტმა მარიამ მეყანწიშვილმა შალვა პაპუაშვილის წინააღმდეგ პატივისა და ღირსების შემლახავი, ცილისმწამებლური განცხადებების უარყოფისა და მორალური ზიანის ანაზღაურების მოთხოვნით სასამართლოში სარჩელი შეიტანა.

იურისტ აიჰან ჰასანლის განმარტებით, ამის მიზეზი პაპუაშვილის მიერ 2025 წლის 17 ოქტომბერს X-ზე გამოქვეყნებული პოსტი გახდა, რომელშიც იგი აქტივისტ მარიამ მეყანწიშვილს "უკიდურესად რადიკალური ჯგუფების ერთ-ერთ ყველაზე ცნობილ წარმომადგენლად" მოიხსენიებს.

ადვოკატის თქმით, "შალვა პაპუაშვილი თავის განცხადებაში პირდაპირ, სახელითა და გვარით, კონკრეტული გარემოებების, ფაქტობრივი მოცემულობისა და სიტუაციის აღწერის საფუძველზე ამტკიცებს", რომ მარიამ მეყანწიშვილი ასევე არის: "მონაწილე ძალადობრივი ჯგუფების ორგანიზებაში 4 ოქტომბერს პრეზიდენტის სასახლეზე განხორციელებული თავდასხმის დროს", "შიდა ტერორიზმში ჩართული" და "ექსტრემისტი". თბილისის საქალაქო სასამართლომ მეყანწიშვილის სარჩელი წარმოებაში არ მიიღო.