იურისტი აიჰან ჰასანლი სოციალურ ქსელში წერს, რომ ოცნების პარლამენტის თავმჯდომარის, შალვა პაპუაშვილის წინააღმდეგ პატივისა და ღირსების შემლახავი, ცილისმწამებლური განცხადებების უარყოფისა და მორალური ზიანის ანაზღაურების მოთხოვნით სასამართლოში სარჩელი შეიტანეს. მისი განმარტებით ამის მიზეზი პაპუაშვილის მიერ 2025 წლის 17 ოქტომბერს X-ზე განთავსებული პოსტი გახდა, სადაც იგი აქტივისტ მარიამ მეყანწიშვილს "უკიდურესად რადიკალური ჯგუფების ერთ-ერთ ყველაზე ცნობილ წარმომადგენლად" მოიხსენიებს. ადვოკატის თქმით, "შალვა პაპუაშვილი თავის განცხადებაში პირდაპირ, სახელითა და გვარით, კონკრეტული გარემოებების, ფაქტობრივი მოცემულობისა და სიტუაციის აღწერის საფუძველზე ამტკიცებს", რომ მარიამ მეყანწიშვილი ასევე არის: "მონაწილე ძალადობრივი ჯგუფების ორგანიზებაში 4 ოქტომბერს პრეზიდენტის სასახლეზე განხორციელებული თავდასხმის დროს"; "შიდა ტერორიზმში ჩართული"; "ექსტრემისტი."

"დღეს შევიტანეთ სარჩელი შალვა პაპუაშვილის წინააღმდეგ პატივისა და ღირსების შემლახავი, ცილისმწამებლური განცხადებების უარყოფისა და მორალური ზიანის ანაზღაურების მოთხოვნით.

2025 წლის 17 ოქტომბერს შალვა პაპუაშვილის მიერ სოციალურ ქსელ X.com–ზე განთავსდა პოსტი, სადაც იგი მარიამ მეყანწიშვილს მოიხსენიებს "უკიდურესად რადიკალური ჯგუფების ერთ-ერთ ყველაზე ცნობილ წარმომადგენლად".

ასევე აცხადებს, რომ მარიამ მეყანწიშვილი "მონაწილეობს პრეზიდენტის სასახლეზე 4 ოქტომბრის თავდასხმის დროს ძალადობრივი ჯგუფების ორგანიზებაში". გარდა ამისა, შალვა პაპუაშვილი უსაფუძვლოდ ამტკიცებს, რომ მარიამ მეყანწიშვილი „შიდა ტერორიზმშია ჩართული", რითაც ფაქტობრივად მას მოიხსენიებს დამნაშავედ, მაშინ როდესაც, არ არსებობს აღნიშნული გარემოების დამადასტურებელი ინფორმაცია და შესაბამისად, კანონიერ ძალაში შესული სასამართლოს გამამტყუნებელი განაჩენი.

შალვა პაპუაშვილი მას მოიხსენიებს როგორც ძალადობრივი დაჯგუფების ერთ-ერთ თვალსაჩინო წარმომადგენელს იმ დროს, როდესაც დაცვის მხარისთვის ჯერ კიდევ ცნობილი არ იყო ის მუხლი, რომლის ჩადენასაც მას ედავებოდნენ. მარიამ მეყანწიშვილს ბრალი წარედგინა დროებითი მოთავსების იზოლატორში 2025 წლის 18 ოქტომბერს, მაშინ როცა შალვა პაპუაშვილის პოსტი უკვე განთავსებული იყო, ვინაიდან ის გამოქვეყნებულია 17 ოქტომბერს.
შალვა პაპუაშვილი თავის განცხადებაში პირდაპირ, სახელითა და გვარით, კონკრეტული გარემოებების, ფაქტობრივი მოცემულობისა და სიტუაციის აღწერის საფუძველზე ამტკიცებს, რომ მარიამ მეყანწიშვილი არის:

1. "უკიდურესად რადიკალური ჯგუფების ერთ-ერთ ყველაზე ცნობილი წარმომადგენელი";

2. "მონაწილე ძალადობრივი ჯგუფების ორგანიზებაში 4 ოქტომბერს პრეზიდენტის სასახლეზე განხორციელებული თავდასხმის დროს";

3. "შიდა ტერორიზმში ჩართული";

4. "ექსტრემისტი."

ეს გარემოებები ცხადყოფს, რომ შალვა პაპუაშვილმა, ერთი მხრივ, დაარღვია მარიამ მეყანწიშვილის მიმართ უდანაშაულობის პრეზუმცია, ხოლო მეორე მხრივ, მის შესახებ გაავრცელა პატივისა და ღირსების შემლახავი, საქმიანი რეპუტაციის დამაზიანებელი, ცილისმწამებლური ინფორმაცია, რომელიც არსებითად მცდარია", — წერს აიჰან ჰასანლი.

ადვოკატი აღნიშნავს, რომ სასამართლოსგან პაპუაშვილის მიერ გავრცელებული არსებითად მცდარი ფაქტების საჯაროდ უარყოფას და 1 ლარის ოდენობით მორალური ზიანის ანაზღაურებას მოითხოვენ.

"ამდენად, აშკარად სახეზეა შალვა პაპუაშვილის მიერ მარიამ მეყანწიშვილის მიმართ ცილისწამება, რის საფუძველზეც ვითხოვთ სასამართლოსგან მის მიერ გავრცელებული არსებითად მცდარი ფაქტების საჯაროდ უარყოფას და მორალური ზიანის ანაზღაურებას 1 ლარის ოდენობით", — წერს იურისტი აიჰან ჰასანლი სოციალურ ქსელში.