ქართული ოცნების მხარდამჭერი კინორეჟისორის, გოგა ხაინდრავას საჩივრის შემდეგ, პროკურატურამ ტელეკომპანია "ფორმულას" წინააღმდეგ ცრუ დასმენის ფაქტზე გამოძიება დაიწყო.

"2026 წლის 16 ივნისს, თბილისის პროკურატურის საგამოძიებო სამმართველოში, საქართველოს სისხლის სამართლის კოდექსის 373-ე მუხლის 1-ლი ნაწილით, ცრუ დასმენის ფაქტზე გამოძიება დაიწყო.

გამოძიების დაწყებას საფუძვლად დაედო კინორეჟისორ გიორგი (გოგა) ხაინდრავას ინტერესების დამცველი ადვოკატების განცხადება ტელეკომპანია "ფორმულას" მიერ გიორგი (გოგა) ხაინდრავას მიმართ დანაშაულის შესაძლო ჩადენის ფაქტთან დაკავშირებით.

საგამოძიებო ორგანოში, მოწმის სახით გამოიკითხა კინორეჟისორი გიორგი (გოგა) ხაინდრავა. ჩატარდება ყველა საჭირო საგამოძიებო და საპროცესო მოქმედება, რომელთა შედეგების შესახებ საზოგადოებას დამატებით მიეწოდება ინფორმაცია," — წერს უწყება.

გოგა ხაინდრავას შეფასებით, გამოძიება დაადასტურებს, რომ სიუჟეტი ცილისწამებაა და ტელეკომპანიას "ზურგს უკან უდგას კრიმინალი, საქართველოდან გაქცეული ადამიანი, რომელმაც გაძარცვა ქართული ჯარი".

"ცილი დამწამეს, რომ მე სუს-თან ერთად, 2000 დოლარის საფასურად, 2000 კაცი არალეგალური პაკისტანელი შემოვიყვანე საქართველოს ტერიტორიაზე. ეს ნიშნავს, რომ ამაში იყო ჩართული, როგორც მინიმუმ, სუს-ი, საზღვრის დაცვის დეპარტამენტი და ეს არის ერთობლივი ანტისახელმწიფოებრივი ქმედება. ეს არის უმძიმესი დანაშაული. ორივე შემთხვევაში, ეს არის უმძიმესი ცილისწამება, იმიტომ რომ სახელმწიფო ინსტიტუტების წინააღმდეგ არის მიმართული. თუ აღმოჩნდება, რომ სახელმწიფო ინსტიტუტები ამაში მონაწილეობდნენ, ეს არის უმძიმესი დანაშაული სახელმწიფო ინსტიტუტების მხრიდან.

მე ბილწსიტყვიანი ვარ თუ არა ვარ, ამას არავითარი მნიშვნელობა [არ აქვს] იმ ცილისწამებასთან, იმ დანაშაულთან, ჩემი ღრმა რწმენით, რომელიც ჩადენილი აქვს ამ ტელეკომპანიას და ეს არაა ერთჯერადი აქტი. ამიტომ, მე ვფიქრობ, რომ ეს სასამართლო აბსოლუტურად დაადასტურებს, რომ ეს არის ცილისწამების და სიცრუის გამავრცელებელი ორგანიზაცია, რომელსაც ზურგს უკან უდგას კრიმინალი, საქართველოდან გაქცეული ადამიანი, რომელმაც გაძარცვა ქართული ჯარი," — განაცხადა გოგა ხაინდრავამ "პირველ არხთან" საუბრისას.

გოგა ხაინდრავამ ტელეკომპანია "ფორმულას" 17 იანვარს გასული სიუჟეტისთვის უჩივლა. ფორმულას სიუჟეტში საუბარი იყო იმაზე, რომ 2016-2017 წლებში გოგა ხაინდრავას, სუს-თან შეთანხმებით, ინდოეთისა და პაკისტანის მოქალაქეები საქართველოში გარკვეული თანხის სანაცვლოდ შემოჰყავდა.