აშშ-ის რესპუბლიკური პარტიის დონორმა, სტივ ნიკანდროსმა, რომელიც ერთ-ერთია, ვინც "MEGOBARI აქტს" მხარი არ დაუჭირა, კონგრესმენ ჯო უილსონს შეხვედრა სთხოვა. ამის შესახებ THE HILL-ის ჟურნალისტი სოციალურ ქსელში წერს და ნიკანდროსის წერილს ავრცელებს.

"გწერთ, რათა გთხოვოთ შეხვედრა, რომ განვიხილოთ საქართველო და აშშ-საქართველოს ურთიერთობები. როგორც მთელი ცხოვრების განმავლობაში რესპუბლიკელი, დიდი ხანია პატივს ვცემ თქვენს სახელმწიფო სამსახურს, თქვენს კონსერვატიულ ხმას და თქვენს ლიდერობას ეროვნული უსაფრთხოებისა და საგარეო პოლიტიკის საკითხებში. სწორედ ამ პერსპექტივიდან გამომდინარე, ჩემთვის დიდი პატივი იქნება თქვენთან სტუმრობა", — აღნიშნულია წერილში.

სტივ ნიკანდროსი თავის წერილში ხაზს უსვამს იმას, რომ მას საქართველოში ოპერირების გამოცდილებიდან გამომდინარე, ჯო უილსონისთვის კერძო სექტორის უნიკალური პერსპექტივის შეთავაზება შეუძლია. ნიკანდროსი უილსონს "შუა დერეფანში" საქართველოს როლის განხილვასაც სთავაზობს.

"საქართველოში ოპერირების თითქმის სამათეულ წლიანი გამოცდილებიდან გამომდინარე, მჯერა, რომ შემიძლია შემოგთავაზოთ კერძო სექტორის უნიკალური პერსპექტივა ამ ქვეყანაზე, მის ამჟამინდელ საინვესტიციო კლიმატსა და იმ პრაქტიკულ შედეგებზე, რაც აშშ-ის პოლიტიკასა და საჯარო გზავნილებს შეიძლება ჰქონდეს ჩემი ტიპის კომპანიებზე და მთლიანად აშშ-ის კერძო სექტორის საქმიანობაზე ამ ქვეყანაში. გარდა ამისა, მივესალმებოდი შესაძლებლობას, განგვეხილა საქართველოს როლი "შუა დერეფანში", რეგიონული ენერგეტიკული უსაფრთხოება და გზები, რომლებითაც აშშ-საქართველოს ძლიერ ურთიერთობას შეუძლია ხელი შეუწყოს ამერიკის უფრო ფართო სტრატეგიულ და ეკონომიკურ ინტერესებს აშშ-ის კერძო სექტორის მეშვეობით.

მჯერა, რომ მოსაზრებების პირდაპირი გაცვლა იქნება კონსტრუქციული და სასარგებლო, და სწორედ ამ კონტექსტშია წარმოდგენილი ჩემი შეხედულებები, როგორც ჩემი კომპანიის აღმასრულებელი დირექტორის, საქართველოში ჩვენი ინვესტიციების საუკეთესო ინტერესების გათვალისწინებით", — აღნიშნულია წერილში.

შეგახსენებთ, იანვარში The Hill წერდა, რომ სტივ ნიკანდროსმა, ჰიუსტონში დაფუძნებული ენერგეტიკული კომპანიის თავმჯდომარემ და აღმასრულებელმა დირექტორმა, რომელიც საქართველოში ნახევარ მილიარდ დოლარზე მეტის ოდენობის ინვესტიციებს აანონსებს, სულ მცირე ერთ რესპუბლიკელ კონგრესმენს წერილი გაუგზავნა და მოუწოდა, წინააღმდეგობა გაეწია "MEGOBARI აქტისთვის".

ნიკანდროსის წერილში აღნიშნულია, რომ მისი კომპანია მომდევნო ორი წლის განმავლობაში საქართველოში 100 მილიონი დოლარის ოდენობის ახალ საინვესტიციო პროგრამას ამზადებს. მისი მტკიცებით, "MEGOBARI აქტი" და თბილისზე სანქციების დაწესების სხვა მცდელობები საქართველოში მოქმედ ამერიკულ ბიზნესებს ზიანს მიაყენებს.

ცნობისთვის ჯო უილსონის ინიცირებულმა "მეგობარი აქტის" კანონპროექტმა პირველი ეტაპი წარმატებით გადალახა. 2025 წლის მაისში ის კონგრესის ქვედა პალატამ ხმათა უმრავლესობით მიიღო (349 — მომხრე, 42 — წინააღმდეგი), საბოლოოდ დასამტკიცებლად კი ზედა პალატაში, სენატში გადავიდა.

სენატში "მეგობარი აქტი" ორჯერ შეფერხდა — 2025 წლის სექტემბერსა და დეკემბერში. როგორც ამერიკული გამოცემა The Hill წერდა, კანონპროექტი ორივეჯერ სენატორმა ჯონ ტუნმა დაბლოკა. მის ამ გადაწყვეტილებას კი ლობირებდა ყოფილი სენატორი მარკვეინ მალინი. მან სენატი 2026 წლის მარტში დატოვა და პრეზიდენტ დონალდ ტრამპის ადმინისტრაციაში ეროვნული უსაფრთხოების მინისტრის თანამდებობაზე დაინიშნა.

ვრცლად ამ თემაზე წაიკითხეთ აქ.