უკრაინის პრეზიდენტმა, ვოლოდიმირ ზელენსკიმ, განაცხადა, რომ რუსეთის მიერ სომხეთის მიმართ გაკეთებული განცხადებები მხოლოდ სომხეთს არ ეხება და რეგიონის ყველა ქვეყანამ უსაფრთხოებაზე მეტი უნდა იფიქროს. ამის შესახებ მან 30 მაისის საღამოს ვიდეომიმართვაში ისაუბრა. ინფორმაციას European Pravda ავრცელებს.

ზელენსკის თქმით, რუსეთი ახლა სომხეთს უფრო ღიად ემუქრება, ვიდრე აქამდე.

"რუსეთის ყველა მეზობელმა გაიგონა ის, რაც სომხეთის შესახებ ითქვა. სომეხი ხალხი ერთადერთია, ვისაც უფლება აქვს და ვინც საკუთარი ქვეყნის მომავალს აირჩევს. და ის, რასაც რუსეთი სომხეთზე ამბობს, სინამდვილეში მხოლოდ სომხეთს არ ეხება. ყველამ უფრო მეტი უნდა იფიქროს უსაფრთხოებაზე და მეტი ერთობლივი ნაბიჯი უნდა გადაიდგას, რათა პოლიტიკურმა პარტნიორობებმა იმუშაოს, არსებობდეს თანამედროვე თავდაცვითი მრეწველობა, თავდაცვის თანამედროვე შესაძლებლობები და მაქსიმალურად მრავალფეროვანი ეკონომიკური კავშირები დამყარდეს", — განაცხადა ზელენსკიმ.

უკრაინის პრეზიდენტმა იმედი გამოთქვა, რომ ევროპისა და განსაკუთრებით ევროკავშირის პოზიცია ამ საკითხებში პრინციპული, ძლიერი და დროული იქნება.

"არავინ უნდა დარჩეს მხარდაჭერის გარეშე. ევროპას არ აქვს უფლება დაკარგოს არც ერთი ადამიანი და არც ერთი ქვეყანა. სომხეთს მხარდაჭერა სჭირდება. მოლდოვას, ბალტიისპირეთის ქვეყნებს, აზერბაიჯანს მხარდაჭერა სჭირდება.ჩვენ უნდა ვიპოვოთ გზები, რათა მხარი დავუჭიროთ საქართველოს ხალხს და ეს საერთო ევროპული ამოცანაა. არავინ უნდა დაიკარგოს", — განაცხადა სახელმწიფოს მეთაურმა.

მანამდე რუსეთის პრეზიდენტმა, ვლადიმირ პუტინმა, განაცხადა, რომ სომხეთს მისი ევროპული ინტეგრაციის მისწრაფებების გამო შესაძლოა "უკრაინული სცენარი" დაემუქროს.

"ამაზე უკვე ვისაუბრე. უკრაინაში კრიზისი თავის დროზე ევროკავშირთან დაახლოების მცდელობებით დაიწყო", — თქვა პუტინმა ასტანაში ევრაზიული ეკონომიკური კავშირის სამიტის შემდეგ გამართულ პრესკონფერენციაზე.

ერთი დღით ადრე რუსეთმა თავისი ელჩი სომხეთიდან გაიწვია, "რათა განეხილათ სომხეთის ხელმძღვანელობის ნაბიჯები ევროკავშირთან დაახლოებისკენ".