სამართალდამცავი ორგანოს თანამშრომელი და ჩეჩნეთის ლიდერის რამზან კადიროვის ვაჟის, ადამ კადიროვის მეგობარი, სავარაუდოდ, სასიკვდილო ავტოსაგზაო შემთხვევაზეა პასუხისმგებელი, რომლის დროსაც დაღესტნელი ცხრა წლის ბიჭი დაიღუპა. ამის შესახებ ინფორმაციას OC MEDIA ავრცელებს.

ოპოზიციური მოძრაობა NIYSO-ს აქტივისტებმა განაცხადეს, რომ კვირას, გროზნო მოლთან ახლოს ავტოსაგზაო შემთხვევა ოფიცერმა, ისლამ იბრაგიმოვმა გამოიწვია. მოკლული 9 წლის ბიჭი დაღესტნიდან გროზნოში სკოლის ექსკურსიაზე იყო ჩამოსული.

NIYSO აცხადებს, რომ იბრაგიმოვი რამზან კადიროვის მესამე ვაჟთან, ადამ კადიროვთან მეგობრობს. მათ მიერ გავრცელებული ფოტო შესაძლოა რამდენიმე წლის წინ იყოს გადაღებული, რადგან ადამ კადიროვი იქ გაცილებით ახალგაზრდა ჩანს.

გარდა ამისა, რამდენიმე წლის წინ NIYSO-მ ასევე გამოაქვეყნა ამონარიდი ხმოვანი ჩატიდან, რომელშიც იბრაგიმოვმა, სავარაუდოდ, თქვა, რომ ის კადიროვის ვაჟებთან მეგობრობდა.

ჩეჩნურ საინფორმაციო სააგენტოებს არ გაუვრცელებიათ ინფორმაცია ავარიის შესახებ. სახელმწიფო დაღესტნურ მედიაში ასევე არ არის ინფორმაცია მსხვერპლის შესახებ. ამავდროულად, ჩეჩნური საინფორმაციო სააგენტოები არ ავრცელებენ ინფორმაციას საგზაო შემთხვევების შესახებ, რომელშიც მონაწილეობდნენ ოფიციალური პირები ან უსაფრთხოების თანამშრომლები, მაშინაც კი, როდესაც ავარიები დადასტურებულია მრავალი წყაროს მიერ. ერთ-ერთი ბოლოდროინდელი თვალსაჩინო მაგალითია 16 იანვარს მომხდარი ავარიაა, რომლის დროსაც ადამ კადიროვი და რამდენიმე პირი დაშავდნენ.