"პირველი სინოდი, როგორც კი შედგება დავაყენებთ წამლის, შეწყალებების, პატიმრობების საკითხებს" — ამის შესახებ ვანისა და ბაღდათის მიტროპოლიტმა, მეუფე ანტონ ბულუხიამ "ტვ პირველთან" საუბრისას აღნიშნა. მისი თქმით, სინოდის უახლოეს შეკრებაზე არაერთი აქტუალური თემა განიხილება. მათ შორის განსაკუთრებული ყურადღება დაეთმობა პატიმართა შეწყალებას და დიუშენის სინდრომის მქონე ბავშვების მედიკამენტებით უზრუნველყოფის პრობლემას.

მღვდელმთავრის განმარტებით, ეკლესიის მესვეურები მზად არიან პრობლემების თანმიმდევრული და სისტემური შესწავლისთვის. სინოდის წევრები უკვე აქტიურად მუშაობენ, რათა თითოეულ მნიშვნელოვან გამოწვევასთან დაკავშირებით კონკრეტული ხედვა შეიმუშაონ.

"პირველი სინოდი, როგორც კი შედგება, ყველა საკითხს დავაყენებთ, დავიწყებთ მეთოდოლოგიურად ყველა საკითხზე — იქ ბავშვის წამლის საკითხები, შეწყალებები, პატიმრობები. რა თქმა უნდა, განვიხილავთ", — განაცხადა მეუფე ანტონმა.

როდესაც მას დიუშენის დაავადების მქონე მოზარდების მხარდაჭერაზე ჰკითხეს, მიტროპოლიტმა დაადასტურა თავისი თანადგომა და აღნიშნა, რომ ამ საკითხზე მას ზუსტად ისეთივე პოზიცია აქვს, როგორიც "ყველა ჯანსაღ ადამიანს უნდა ჰქონდეს".

მეუფე ანტონი მიიჩნევს, რომ ეს საკითხები სხდომის გეგმაში ორგანულად დაიკავებს ადგილს და სინოდი მმართველ გუნდს შესაბამის რეკომენდაციებსაც მიაწვდის. მისივე თქმით, ეს პროცესი სხვა მღვდელმთავრების საერთო ნებასაც გამოხატავს და განხილვისთვის სრული მზაობა არსებობს.

"თავისთავად დადგება, მეც რომ არ დავაყენო, ყველანი მობილიზებულები ვართ, რომ ეს საკითხები განვიხილოთ", — განაცხადა მეუფე ანტონმა.

შეგახსენებთ, დიუშენის კუნთოვანი დისტროფიით დაავადებული ბავშვების მშობლებმა წამლის მოთხოვნით კანცელარიასთან 27-ე ღამე უკვე გაათიეს. ისინი თავიანთი შვილებისთვის იმ სამკურნალო პრეპარატების შემოტანას ითხოვენ, რომელთა დიდმა ნაწილმა აშშ-ისა (FDA) და ევროპის (EMA) მკაცრი სამედიცინო კონტროლი უკვე გაიარეს..