2024 წელს მიმდინარე აქციების დროს ზვიად მოსიაშვილის, ლევან ხაბეიშვილის და გურამ როგავას მიმართ განხორციელებული ძალადობის ფაქტებზე სამი ყოფილი, ერთი მოქმედი სპეცრაზმელი და შსს-ს დაცვის პოლიციის თანამშრომელი დააკავეს.

ამ ფაქტს "ტვ პირველთან" გამოეხმაურა განსაკუთრებულ დავალებათა დეპარტამენტის ყოფილი ხელმძღვანელი ზვიად ხარაზიშვილი ("ხარება"). მისი თქმით, სპეცრაზმელები შიგნიდან "ჩაუშვეს", რადგანაც მისთვის საეჭვოა რამდენადაა შესაძლებელი კადრებით სპეცრაზმელთა იდენტიფიცირება ნიღბებისა და ეკიპირების პირობებში.

ზვიად ხარაზიშვილმა ასევე განმარტა, რომ მისთვის ცემის ან მკვლელობის ბრძანება არავის მიუცია და ასევე არც მას გაუცია ასეთი დავალებები.

"მე ჩემი სამშობლო ისე მიყვარს, ტყვიის არ მეშინია და ციხით მე ვერავინ ვერ შემაშინებს. მე წავალ და მე ჩავჯდები თუ ჩემს სამშობლოს სჭირდება, თუ ჩემს ქვეყანას ამით რამე ეშველება და თუ ამ ბიჭებს აღარ შეაწუხებენ, ეს არის ჩემი სათქმელი. მე არაფერი არ დამიშავებია, არც ამ ბიჭებს არაფერი დაუშავებია. ეს ყველამ კარგად იცის.

ჩაშვებულია აბა რა არის, მაგნაირ ხალხს რა გამოლევს შიგნით თითს რომ იშვერენ. თვითონ თბილად იყოს ვინმე და სხვა გაიწიროს ალბათ ეგეთი რამე გააკეთა ვიღაც არაკაცმა, ეგ ბიჭები ახლა რა შუაშია. 18 წელი ვიყავი სპეციალური დანიშნულების რაზმის საბრძოლო უფროსი, მსგავსი ბრძანება არცერთ მინისტრს, არცერთ ხელმძღვანელს ჩემთვის არ მოუცია, ან ვინმე მოკალი ან ვინმე ცემე, კარგად იცით რამდენი მინისტრი, რამდენი მთავრობა გამოვიცვალეთ

იყო დანაშაული? იყო გადაცდომა? მზად ვარ პასუხი ვაგო მე პირადად ყველაფერზე, არც მე გამიცია მსგავსი ბრძანებები, რომ წაქცეული ეცემა ვინმეს და მსგავსი ქმედებები რაც იყო ცუდი გაკეთებინათ, არც ჩემთვის არავის დაუვალებია.

სასიამოვნო მოსასმენი არ არის როდესაც მეკითხებიან იყო ასეთი ბრძანება, არაფერი ბრძანება არ ყოფილია.

არ ვიცი იდენტიფიცირება მოხდა რომ? ეს არ ვიცი. ახლა "მასკიანი" ადამიანები, იცით ნიღბიანები, ეკიპირებით..", — განაცხადა ხარაზიშვილმა (სტილი დაულია).

შეგახსენებთ, ზვიად ხარაზიშვილი აშშ-ის, დიდი ბრიტანეთისა და ლიეტუვის მიერაა სანქცირებული.

ის ედუარდ შევარდნაძის მმართველობის დროს სახელმწიფო დაცვის სპეციალური სამსახურის სპეცრაზმში იყო. ერთიანი ნაციონალური მოძრაობის მმართველობის პერიოდში კი "ხარება" სპე­ცი­ა­ლუ­რი ოპე­რა­ტი­უ­ლი დე­პარ­ტა­მენ­ტის (სოდ-ი) სპეცრაზმელი გახდა. ის მონაწილეობდა 2009 წელს მუხროვანის ამბოხთან დაკავშირებული სპეცოპერაციაში, სადაც იმჟამინდელი შს მინისტრი ვანო მერაბიშვილი სამხედრო ფორმაში ჩაცმულ პირებს მიმართავდა, რომ 'ორი გვამი სჭირდება".

ქართული ოცნების მმართველობის დროს ზვიად ხარაზიშვილი ჯერ სახელმწიფო უსაფრთხოების სამსახურში სპეციალური ოპერაციების დეპარტამენტის დირექტორი, ხოლო 2021 წლიდან 2025 წლამდე კი შსს-ის განსაკუთრებულ დავალებათა დეპარტამენტის დირექტორი იყო.