UFC-ის ვარსკვლავები: ილია თოფურია, ჯასტინ გეიჯი, ალექს პერეირა და სირილ განი თეთრი სახლის ოვალურ კაბინეტში აშშ-ის პრეზიდენტს, დონალდ ტრამპს შეხვდნენ. ვიზიტი წინ უსწრებს ისტორიულ ტურნირს სახელწოდებით UFC Freedom 250, რომელიც 2026 წლის 14 ივნისს ვაშინგტონში, უშუალოდ თეთრი სახლის წინ გაიმართება.

შეხვედრისას ტრამპმა ღონისძიების ახალი დეტალები გაამჟღავნა, მათ შორის წარადგინა სპეციალურად შექმნილი საჩემპიონო ქამარი და ბრძოლის ადგილის პირველადი ვიზუალი. საუბრის დროს ქვემსუბუქი წონის ჩემპიონმა, ილია თოფურიამ, ტრამპს უთხრა, რომ არ ეგონა, თუ პრეზიდენტი ასეთი კეთილი აღმოჩნდებოდა, რაზეც ტრამპმა უპასუხა, რომ მას მცდარი იმიჯი აქვს შექმნილი.

ფოტო: Getty Images

ამის შემდეგ თოფურიამ უფრო პირდაპირი კითხვა დასვა: "რატომ გსურდათ, რომ თქვენი მეგობრისთვის ასეთი რთული გამოცდა მოგეწყოთ?". სანამ ტრამპი უპასუხებდა, საუბარში ჯასტინ გეიჯი ჩაერთო და აღნიშნა, რომ პრეზიდენტმა კარგად იცის მებრძოლის სურვილები. ტრამპმა დაადასტურა, რომ მას სწორედ ყველაზე რთული გამოწვევების ორგანიზება სურს და იკითხა, რამდენად იყვნენ სპორტსმენები გამარჯვებაში დარწმუნებულნი. თოფურიამ უპასუხა, რომ საკუთარ ძალებში 100 პროცენტით არის დარწმუნებული და სურს, რომ მეტოქესაც მსგავსი რწმენა ჰქონდეს, რათა ბრძოლა დაუვიწყარი გამოვიდეს.

დაუმარცხებელი მებრძოლი ამ დაპირისპირებას დიდი მოტივაციით ხვდება. მან აღნიშნა, რომ ახლა მხოლოდ ბრძოლაზეა ფოკუსირებული, რადგან აღარ უწევს ფინანსურ ვალდებულებებზე ან წონის კლებაზე ნერვიულობა. ამჟამინდელი მონაცემებით, ტოტალიზატორები თოფურიას გეიჯისთან ბრძოლაში აშკარა ფავორიტად მიიჩნევენ.